जनमत वाङ्मय प्रतिष्ठानद्वारा १५ स्रष्टा तथा समाजसेवी सम्मानित

काठमाडौं । जनमत वाङ्मय प्रतिष्ठानले २०७९ सालको विभिन्न सम्मान एक समारोहकाबीच स्रष्टाहरूलाई समर्पित गरेको छ ।

शनिबार बनेपा काभ्रेमा आयोजित जनमतको ४०औँ वार्षिकोत्सव तथा सम्मान कार्यक्रममा प्रमुख अतिथि कवि तथा कलाकार नरेन्द्रबहादुर श्रेष्ठले ‘दीपा–जनमत सम्मान’ प्रा. डा. लक्ष्मणप्रसाद गौतम (बागलुङ), ‘गणेश÷खिलकुमारी दुवाल–जनमत सम्मान’ प्रमोद प्रधान (मोरङ), ‘हृदयचन्द्र–जनमत वरिष्ठ साधक सम्मान’ डा. अभि सुवेदी (तेह्रथुम), ‘जनमत–जनक प्रधान सेवा सम्मान’ राजेश खनाल (महोत्तरी) लाई प्रदान गरे ।

त्यसैगरी ‘केवलपुरे–जनमत सम्मान’ नर्मदेश्वरी सत्याल (संखुवासभा), ‘जनमत–महेन्द्रलाल कलाकार सम्मान’ रवीन्द्र श्रेष्ठ (भक्तपुर), ‘कमला सैंजू–जनमत सम्मान’ लक्ष्मी माली (काठमाडौं), ‘जनमत–राजभाइ सहयात्री सम्मान’ बाबुराम श्रेष्ठ ‘वर्षा’ (मोरङ) र ‘भारती–जनमत साहित्यिक पत्रकारिता सम्मान’ मेरिना स्मृति (काठमाडौं) लाई प्रदान गरिएको छ ।

कार्यक्रममा ‘जनमत–केदार÷सुदर्शना बालसाहित्य सम्मान’ गंगादेवी कसजू (बाग्लुङ), ‘जनमत–सिचि धर्म÷संस्कृति सम्मान’ रामकृष्ण कर्माचार्य (ललितपुर), ‘जनमत–मित्र अनुवाद राष्ट्रिय सम्मान’ महेश पौड्याल (काठमाडौं) तथा ‘जनमत–दीपक वैद्य स्वास्थ्य सम्मान’ डा. सिर्जना श्रेष्ठ (काठमाडौं) लाई प्रदान गरियो । सम्मानित व्यक्तित्वहरूलाई जनही नगद राशि १० हजारसमेत प्रदान गरियो ।

कार्यक्रममा जनमतद्वारा प्रकाशित ‘नेताका साथी’ (एकांकी) लोकेन्द्रबहादुर चन्द, ‘आलोचना र परिचय’ (दोस्रो संस्करण)मोहन दुवाल, ‘किरणको वेदना’ (नाटक) सिद्धिबहादुर कर्माचार्य, ‘स्वर्गको दरबार’ (तेस्रो संस्करण) शुक्रराज शास्त्री र ‘जनमत जानकारी’ (विविधा) सं. मोहन दुवाल लगायतका पुस्तकहरू सार्वजनिक गरिए ।

उक्त अवसरमा प्रमुख अतिथि नरेन्द्रबहादुर श्रेष्ठ, गंगा सुवेदी, मोहन दुवाल, प्रा.डा. लक्ष्मणप्रसाद गौतम, प्रमोद प्रधान, बाबुराम श्रेष्ठ ‘वर्षा’ले बोलेका थिए ।