४ अषाढ,भक्तपुर जिल्लाको भक्तपुर पार्टी भेन्युमा सिर्जना अभियान समाजले हरिगोविन्द भोमीद्वारा लिखित लघुकथासङ्ग्रह ‘समय’ विमोचन गरिएको छ । उक्त पुस्तकको विमोचन साहित्यकार मोहनबहादुर कायस्थ, धनमान श्रेष्ठ, खेमराज पोख्ररेल, विश्वराज अधिकारी, लता केसी, धु्रव मधिकर्मी हरिगोविन्द भोमी र डा. शेखरकुमार श्रेष्ठले संयुक्त रूपमा गरेका थिए ।
विमोचन कार्यक्रममा लघुकथाकार धु्रव मधिकर्र्मीले स्वागत मन्तव्य राखेका थिए भने हाम्रो लघुकथा पाठशालाका संस्थापक तथा लघुकथाकार लता केसीले हाम्रो पाठशालाको गतिविधि प्रस्तुत गर्दै शुभकामना मन्तव्य दिएकी थिइन् । हरिगोविन्दबाट लिखित प्रस्तुत लघुकथासङ्ग्र्रहले वर्तमान नेपाली समाजमा देखिएका विकृति विसङ्गति प्रस्तुत गरी समाज सुधारका लागि लाग्न सन्देश दिएको कुरा पुस्तकको समीक्षा गर्ने क्रममा डा. शेखरकुमार श्रेष्ठले बताएका थिए ।
कार्यक्रममा साहित्यकार खेमराज पोखरेलले लघुकथा लेखन सिपको बारेमा विचार राखेका थिए भने साहित्यकार विश्वराज अधिकारीले पनि लघुकथा लेखनका साथै बजारको बारेमा धारणा राखेका थिए । उनले लघुकथा लेखन र प्रकाशनले बजारको माग बोके पनि प्रकाशक, वितरक र पुस्तक विक्रेताले यसको उत्तरादायित्त्व वहन गरी साहित्यकारको प्रवद्र्धन गर्न नसकेको विचार राखेका थिए ।
यस कार्यक्रममा प्रमुख अतिथि मोहनबहादुर कायस्थले दुई सय पचास वर्षपूर्व मेरा पुर्खा पनि यहीँका बासिन्दा भएको भन्दै भक्तपुरमा विकसित भएको साहित्यिक कार्यक्रमको प्रशंसा गरे । यस सिलसिलामा उनले सिर्जना अभियान समाज, भक्तपुरलाई पच्चिस हजार रुपैयाँ हस्तान्तरण गर्दै आज उपस्थित भएका व्यक्तिहरूको एक सय एक लघुकथा सङ्कलन गरी प्रकाशन गरेमा आफूले प्रकाशनको अभिभारा लिने कुरा बताए ।
समाजद्वारा आयोजित यस कार्यक्रममा साहित्यकार विनोद नेपाल, शेखर अर्याल, ममता मृदुल, वन्दना घिमिेरे, मदन पोखरेल, शान्ता शाक्य, मनिशकुमार शर्मा समित, कुमुदप्रसाद प्याकुरेललगायत सयौँको सङ्ख्यामा लघुकथाकार तथा लघुकथा अनुरागीको उपस्थिति थियो । कार्यक्रममा हरिगोविन्द भोमीले उपस्थित सबैलाई धन्यवाद दिएका थिए । आजको यो विमोचन सिर्जना अभियान समाजका अध्यक्ष एवं साहित्यकार धनमान श्रेष्ठको सभाध्यक्षमा भएको थियो भने कार्यक्रमको सञ्चालन समाजका सचिव विपिनचन्द्र बनेपालीले गरेका थिए ।
