अञ्जना पौडेलको उपन्यास ‘चरीमाई’ लोकार्पण

काठमाडौँ । उपन्यासकार अन्जना पौडेलद्वारा लिखित ‘चरीमाई’ उपन्यास सार्वजनिक गरिएको छ । शताब्दी साहित्य प्रतिष्ठान र इन्डिगो प्रकाशनले आयोजना गरेको कार्यक्रममा प्रा.डा. विन्जु शर्माले उपन्यासको विमोचन गर्नुभयो ।
चेलीबेटी बेचबिखनको सवाललाई समावेश गरिएको उपन्यासलाई इन्डिगो इन्क प्रालिले प्रकाशन गरेको हो । ‘चरीमाई’ का लेखिका पौडेलले आफ्नो उपन्यास बेचिएका हजारौँ दिदिबहिनीहरुको न्यायको लडाइँमा आफैँलाई आहुति दिने सम्पूर्ण चेलीहरूप्रति समर्पण गर्नुभयो ।
उपन्यासकार पौडेलले भन्नुभयो, “चरीमाई बेचबिखनमा परेका सीमान्तकृत चेलीहरूको सामूहिक स्वर हो ।” सोही अवसरमा प्राडा शर्माले ‘चरीमाई’ उपन्यास चेलीबेटी बेचबिखनविरुद्धको सशक्त उपन्यास भएको टिप्पणी गर्नुभयो ।
उपन्यासकार पौडेलले यसअघि कथा, कविता, गीत, हाइकु र मुक्तसमेत प्रकाशन गरिसक्नुभएको छ । ‘चरीमाई’ भने उहाँको पहिलो उपन्यास हो ।