काठमाडौं – अमेरिकी राष्ट्रपति डोनाल्ड ट्रम्पले बेलायतले चीनसँग व्यापारिक सम्बन्ध विस्तार गर्नु अत्यन्तै खतरनाक कदम भएको बताएका छन् ।
बेलायती प्रधानमन्त्री किएर स्टार्मर तीनदिने चीन भ्रमणमा छन् । चिनियाँ राष्ट्रपति सी जिनपिङसँग सम्बन्ध सुधार्ने प्रयासमा रहेका बेला ट्रम्पको यो टिप्पणी आएको हो ।
ट्रम्पको यो चेतावनीको जवाफमा बेलायती प्रधानमन्त्रीको कार्यालय ‘डाउनिंग स्ट्रिट’ले वासिंटनलाई यो भ्रमण र यसका उद्देश्यहरूबारे पहिल्यै जानकारी गराइएको संकेत दिएको छ । साथै, बेलायतले ट्रम्प आफैँ पनि आगामी अप्रिलमा चीन भ्रमणमा जान लागेको कुरा स्मरण गराएको छ ।
ट्रम्पले क्यानडाको पनि कडा आलोचना गरेका छन् । उनले भनेका छन्, “मलाई लाग्छ, क्यानडाका लागि यो अझ बढी खतरनाक छ । क्यानडाले राम्रो प्रदर्शन गरिरहेको छैन । र, तपाईं चीनलाई समाधानका रूपमा हेर्न सक्नुहुन्न ।”
अमेरिकी चेतावनीका बाबजुद, प्रधानमन्त्री किएर स्टार्मरले आफ्नो भ्रमणलाई सफल बताएका छन् । ‘बैंक अफ चाइना’मा आयोजित यूके–चाइना बिजनेस फोरममा बोल्दै उनले राष्ट्रपति सी चिनफिङसँगको कुराकानी सकारात्मक रहेको र अब बेलायत–चीन सम्बन्ध राम्रो र बलियो स्थितिमा रहेको दाबी गरे ।
क्युवालाई तेल आपूर्ति गर्ने देशमाथि ट्रम्पको थप प्रतिबन्ध
अमेरिकी राष्ट्रपति ट्रम्पले क्युवालाई तेल बिक्री गर्ने वा उपलब्ध गराउने देशहरूका सामानमा थप भन्सार शुल्क लगाउने घोषणा गरेका छन् । ट्रम्पको यो निर्णयले ‘अन्तर्राष्ट्रिय आपत्कालीन आर्थिक शक्ति ऐन’लाई सक्रिय गर्दै क्युवाको सरकारलाई अमेरिकी राष्ट्रिय सुरक्षाका लागि असाधारण खतरा बताएको छ ।
क्युवाका विदेशमन्त्री ब्रुनो रोड्रिगेजले ट्रम्पको यस कदमलाई निर्मम आक्रमण भन्दै कडा निन्दा गरेका छन् । यसले क्युवामा पहिलेदेखि नै व्याप्त गम्भीर ऊर्जा संकटलाई अझ भयावह बनाउने निश्चित रहेको बताइएको छ । इन्धन अभावका कारण त्यहाँको विद्युतीय प्रसारण प्रणाली नराम्ररी प्रभावित भएकाले गर्दा देशव्यापी रूपमा ‘ब्ल्याकआउट’ भइरहेको छ ।
भेनेजुएलाको तेलमा पूर्ण रोक
सन् १९६२ देखि नै क्युवा अमेरिकी नाकाबन्दीको मारमा छ । विदेशमन्त्री रोड्रिगेजले सामाजिक सञ्जालमा लेखेका छन्, “६५ वर्षभन्दा बढी समयदेखि इतिहासकै सबैभन्दा लामो र क्रूर आर्थिक नाकाबन्दी खेपिरहेका क्युवाका जनतालाई अहिले झन् चरम कष्टकर जीवनतर्फ धकेलिँदै छ ।”
क्युवा आफ्नो ऊर्जा आवश्यकताका लागि भेनेजुएला, मेक्सिको र रुसजस्ता सहयोगी राष्ट्रहरूमा निर्भर रहँदै आएको थियो । तर, यसै महिनाको सुरुमा अमेरिकाले भेनेजुएलामा सैन्य आक्रमण गरी राष्ट्रपति निकोलस मादुरोलाई ‘अपहरण’ गरेपछि त्यहाँबाट हुने आपूर्ति ठप्प भएको छ ।
ट्रम्पले अब भेनेजुएलाको कुनै पनि तेल क्युवा नपुग्ने चेतावनी दिँदै क्युवाली सरकार पतनको संघारमा रहेको दाबी गरेका छन् । एजेन्सी
