ललितपुर –ललितपुरको पाटनस्थित कृष्णमन्दिर अगाडि चक्कु प्रहारबाट घाइते भएका दाजुभाइको मृत्यु भएको छ ।सामान्य फोन सम्पर्कबाट सुरु भएको विवादले भयावह रूप लिँदा पाँचथर घर भई हाल इमाडोल बस्दै आएका ३३ वर्षीय सुमीत नेम्बाङ र उनका २६ वर्षीय भाइ सिर्जन नेम्बाङको बुधबार साँझ हत्या भएको हो ।
प्रहरीका अनुसार, हत्यामा संलग्न सञ्जीव नेपालीलाई घटनालगत्तै पक्राउ गरिएको छ । उनीसँगै संलग्न अर्का एक व्यक्तिलाई पनि नियन्त्रणमा लिइएको छ।
प्रारम्भिक अनुसन्धानले देखाएअनुसार, नेम्बाङ दाजुभाइले गरेको फोन झुक्किएर सञ्जीवको नम्बरमा पुगेको थियो । अपरिचितबीच सुरुमा सामान्य संवाद भए पनि केहीबेरमै विवाद चर्किएको थियो ।फोनमै भनाभन बढ्दै जाँदा सञ्जीवले उनीहरूलाई पाटन बोलाएका थिए।
इमाडोलबाट पाटन पुगेका दाजुभाइमाथि सञ्जीवले मासु पसलमा प्रयोग हुने धारिलो हतियारले आक्रमण गरेको प्रहरीले जनाएको छ ।गम्भीर घाइते भएका दुवैको बीएन्डबी अस्पतालमा मृत्यु भएको हो । घटनाबारे थप अनुसन्धान भइरहेको जिल्ला प्रहरी परिसर ललितपुरले जनाएको छ ।
