काठमाडौँ – अमेरिका र इरानबीच युद्धविरामको घोषणा भएपछि विश्व बजारमा राहत देखिएको छ । विशेषगरी कच्चा तेलको मूल्यमा उल्लेख्य गिरावट आएको छ ।
अन्तर्राष्ट्रिय सञ्चारमाध्यमका अनुसार अमेरिकी कच्चा तेल करिब १६ प्रतिशत घटेर प्रति ब्यारेल ९४.५९ डलरमा झरेको छ । त्यस्तै ब्रेन्ट कच्चा तेल पनि करिब १५ प्रतिशत घटेर ९२.३५ डलरमा पुगेको छ ।
युद्धविराम र तेलको मूल्य घटेसँगै एसियाली शेयर बजारमा पनि सकारात्मक प्रभाव देखिएको छ । कारोबार सुरु भएसँगै बजारमा तीव्र वृद्धि भएको छ ।
जापानको निक्केई सूचक चार प्रतिशतभन्दा बढीले बढेको छ भने दक्षिण कोरियाको कोस्पी सूचक पाँच प्रतिशतभन्दा बढीले उकालो लागेको छ । लगानीकर्तामा विश्वास फर्किँदा बजारले राहत महसुस गरेको विश्लेषकहरूले बताएका छन् ।
