पोखरामा ‘अभ्यन्तर’ कथासङ्ग्रहको परिचर्चा सम्पन्न

पोखरा– सिर्जनशील लोकतान्त्रिक प्रतिष्ठान पोखराले कन्या क्याम्पस नदीपुरमा आयोजना गरेको मासिक कार्यक्रममा सुमन वर्षाको ‘अभ्यन्तर’ कथासङ्ग्रहको परिचर्चा सम्पन्न गरेको छ । वरिष्ठ साहित्यकार सरुभक्तको प्रमुख आतिथ्यमा सम्पन्न कार्यक्रममा सङ्ग्रहको विषयवस्तु र शिल्प पक्षमाथि विस्तृत छलफल भएको थियो ।

डा. सविन्द्रराज भण्डारीले ‘अभ्यन्तर’ का कथाहरू विषयगत नवीनताले भरिपूर्ण रहेको बताउँदै सामाजिक विकृति विसङ्गतिलाई यथार्थपरक ढङ्गले प्रस्तुत गर्नुका साथै स्वैरकल्पनाको माध्यमबाट सुदूर नेपाली समाजको मार्मिक चित्रण गरिएको उल्लेख गर्नुभयो । उहाँले कथाहरूमा समसामयिकता र मौलिकताको समिश्रण रहेको धारणा राख्नुभयो ।

डा. भूमिराज बस्ताकोटीले सङ्ग्रहको शिल्प पक्षमाथि प्रकाश पार्दै केही कथामा नवीन शैलीगत प्रयोग भए पनि अधिकांशमा पुरानै ढाँचाको प्रयोग देखिएको बताउनुभयो । यद्यपि, केही कथामा बुनोट, सिप र भाषाको प्रयोगले पाठकलाई प्रभावित पार्न सफल भएको उहाँको विश्लेषण थियो ।

प्रमुख अतिथि सरुभक्तले स्रष्टा सधैँ कुनै न कुनै भ्रमको बीचमा बाँचिरहेको र त्यही भ्रमबाटै उत्कृष्ट साहित्य सिर्जना हुने विचार व्यक्त गर्नुभयो । नेपाली साहित्यमा विज्ञान कथाको इतिहास लामो भए पनि इतिहास लेखनको दृष्टिले अपेक्षित काम नभएको उहाँको धारणा थियो । वर्षाले ‘क्लोन’ जस्तो विज्ञानप्रविधिलाई आधार बनाएर लेखेको कथाको उहाँले प्रशंसा गर्नुभयो ।

कार्यक्रममा संस्थाका पूर्व अध्यक्ष दीपेन्द्र पराजुलीले सङ्ग्रहको सारसंक्षेप प्रस्तुत गर्नुभयो भने त्रिविका सिनेटर कमलराज सापकोटाले शुभकामना मन्तव्य राख्नुभयो। कथाकार सुमन वर्षाले कृति प्रकाशित भएपछि त्यो लेखकको नभई पाठकको हुने र पाठकले विभिन्न आधारमा विश्लेषण गर्न सक्ने विचार राख्नुभयो ।

सुरज पौडेलको अध्यक्षतामा सम्पन्न कार्यक्रमको सञ्चालन डा. पिताम्बर पौडेलले गर्नुभएको थियो भने डा. श्रीधर न्यौपानेले स्वागत मन्तव्य राख्नुभएको थियो । इन्दु सुवेदी पौडेलले रचना वाचन गर्नुभएको थियो । कार्यक्रममा संस्थाका पदाधिकारी, सदस्यहरू, अन्य संघसंस्थाका प्रतिनिधि तथा शुभेच्छुकहरूको उपस्थिति रहेको थियो । रोबस्ट एजुकेसन कन्सल्टेन्सी र पोखरा आदर्श माध्यमिक विद्यालयले कार्यक्रमलाई सहयोग गरेको थियो ।