डा. दामोदर पुडासैनीको अस्तित्ववादी मनालाप कृति ‘कालो आँधी’ प्रकाशित

काठमाडौं – साहित्यकार डा. दामोदर पुडासैनी ‘किशोर’द्वारा लिखित अस्तित्ववादी मनालाप कृति ‘कालो आँधी’ प्रकाशित भएको छ ।
डा. पुडासैनीलाई नेजोफेरेन्जियल कार्सिनोमा नामक क्यान्सरले आक्रमण गरेपछि उनले यो कृति तयार पारेका हुन् ।
बाँच्ने सम्भावना क्षीण हुँदाहुँदै पनि पुडासैनीले मृत्युसँग लड्दै आफ्ना तातो अनुभव र अनुभूतिहरू अस्तित्ववादी मनालाप कृति ‘कालो आँधी’ प्रस्तुत गरेका छन् । यो पुस्तक अग्रणी प्रकाशन संस्था रत्न पुस्तक भण्डार हालसालै प्रकाशनमा ल्याएको हो ।
उत्तर बंगाल युनिभर्सिटी, भारतका प्रा.डा. कृष्णराज घतानीले डा. पुडासैनीको ‘कालो आँधी’ जीवनको कठोर पीडा र संघर्षको कथा मात्र होइन जीवनलाई नवीन ढँगले अघि बढाउँन उत्प्रेरित गर्ने गहन कृति भएको बताएका छन् ।
त्यस्तै, भारतीय प्रा.डा. तेजबहादुर क्षेत्रीले ‘कालो आँधी’ नयाँ दार्शनिक दृष्टि बोकेको कृति भएको बताएका छन् ।
कृतिको भूमिकामा प्रा.डा. नेत्र एटमले ‘कालो आँधी’ सुनाउन लेखिएको नभएर अनुभूत गराउन रचिएको बताएका छन् ।