डा. त्रिलोचन उप्रेतीका दुई पुस्तक लोकार्पण

काठमाडौं । पूर्वसचिव डा. त्रिलोचन उप्रेतीद्वारा लिखित दुई पुस्तक ‘अन्तर्राष्ट्रिय कानुन र नेपालको जलस्रोत’ तथा त्यसको अंग्रेजी अनुवाद ‘इन्टरनेसनल ल एन्ड नेपाल्स वाटर रिसोर्सेस’ एक समारोहबीच लोकार्पित भएको छ ।
मंगलबार प्रज्ञा प्रतिष्ठानमा आयोजित कार्यक्रममा प्रमुख अतिथि प्रधानन्यायाधीश प्रकाशमानसिंह राउत लगायतले दुवै कृति सार्वजनिक गरे ।
कार्यक्रममा पुस्तकमाथि समीक्षात्मक मन्तव्य राख्दै पूर्वसचिव डा. द्वारिकानाथ ढुंगेलले पुस्तकले पानीको विषयमा बृहत्त् दृष्टिकोण राखेको बताउँदै हामीले पानीको महत्त्व बुझ्नुपर्ने र त्यसको प्रयोग कसरी गर्ने भन्ने विषयमा किताब केन्द्रित रहेको उल्लेख गरे ।
अर्का वक्ता विकास थापाले भारतसँग जलस्रोतका विषयमा कसरी सहकार्य गर्न सकिन्छ भन्नेबारे किताबले बोलेको उल्लेख गरे । उनले जलस्रोतको चुनौती भनेकै नेपालका नेताहरू भएको भन्दै खरो टिप्पणी गरे । अर्का वक्ता रत्नसंसार श्रेष्ठले पनि पुस्तकमाथि समीक्षात्मक मन्तव्य राखे ।
पुस्तक वाटर एसिया इन्टरनेसनलले प्रकाशित गरेको हो ।