अषाढ,३ पर्वतः नाटक ‘केस नम्बर ३११’ मञ्चन तयारी पुरा भएको छ। पोखरा थिएटरको प्रस्तुतिमा तयार भएको यो नाटक असार तीन गते शुक्रवारदेखि पोखरामा रहेको गन्धर्व नाटक घरमा मञ्चन गर्न लागिएको हो।
असार ११ गतेसम्म मञ्चन हुने नाटकको लेखन तथा निर्देशन पोखरा थिएटरको ब्याच चार र ब्याच पाँचका प्रशिक्षार्थीले गरेका छन्।
सहजकर्ताको रूपमा पोखरा थिएटरका अध्यक्ष परिवर्तनले सघाउँदै छन्। नाटक बुधवार बाहेक हरेक दिन साँझ सवा पाँच बजे मञ्चन हुने तथा शनिवार र आइतबार दिउँसो एक बजे समेत नाटक हेर्न पाइने छ। नाटकको परिकल्पना दिव्य अमृत, दिप्सना विश्वकर्मा, सुशील बरालले गरेका छन्।
नाटकमा न्यायाधीशको भूमिकामा झलक थापा, इजलास अधिकृतको भूमिकामा सुशील बराल र मनीसा के।सी, सरकारी वकिलको भूमिकामा अदित भुजेल र निजी वकिलको भूमिकामा एलिसा भोगले अभिनय गर्ने छन्। यसै गरी कार्यालय सहयोगीको भूमिकामा गोपाल भुसाल, शिखाको भूमिकामा अनामिका रिजाल, जीवनको भूमिकामा प्रतीक राउत, रत्नाको भूमिकामा प्रतिभा रिमाल, छिमेकीको भूमिकामा पाल्मती थापा, प्रहरीको भूमिकामा कमल तामाङ, दिप्सना विश्वकर्मा र सुरज तिवारी तथा
मनोचिकित्सकको भूमिकामा दिव्य अमृतलाई हेर्न पाइनेछ। नाटकलाई ड्रामाटर्जी गर्न अधिवक्ता एवं लेखक दीपक पराजुलीले साथ दिएका छन्।् ।
हिंसाले पीडितमा पार्न सक्ने मानसिक असरलाई चित्रण गर्ने अभिप्रायले समसामयिक विषयमा नाटक तयार पार्न खोजेको निर्देशकहरूको भनाई छ। नाटक हेरिसकेपछि महिला हिंसा र मनोविज्ञानका सम्बन्धमा नयाँ अवधारणा बन्ने उनीहरू बताउँछन्। पोखरा थिएटरमा पहिलो पटक इम्प्रोभाइजेस्नल विधिबाट यो नाटक तयार पारिएको हो।
तीन महिना लामो अभिनय प्रशिक्षण पश्चात नाटक तयार हुन लागेको तथा नाटकले गम्भीर मानसिक स्वास्थ्यको विषयलाई उठान गरेको कारण दर्शकको माया पाउने सहजकर्ता एवं पोखरा थिएटरका अध्यक्ष परिवर्तनको विश्वास छ । नाटकमा १९ वर्षीय शिखाले भोगेको हिंसा र हिंसाको कारण उत्पन्न मानसिक अवस्थालाई गहन ढंगले प्रस्तुत गरिनेछ ।
पोखरा थिएटरले स्थापना कालदेखि विभिन्न प्रशिक्षण कार्यक्रम गर्दे आएको छ। हरेक वर्ष ब्याच कक्षाको नाममा तीन महिने अभिनय प्रशिक्षण कार्यक्रम हुने गरेको छ। यो प्रशिक्षण पाँचौँ ब्याचसम्म आइसकेको छ भने यी प्रशिक्षण कार्यक्रममा सहभागी बनेका धेरै जना नेपाली रंगमञ्चमा क्रियाशिल छन्। चौथो र पाँचौँ ब्याचको समायोजन गरेर यो नाटक तयार पारिएको हो।पोखरा थिएटरको प्रस्तुतिमा आउँदो साउनको दोस्रो सातादेखि कक्षा नौ को पाठ्यक्रममा समावेश ‘भविष्य निर्माण’ कथामा आधारित नाटक मञ्चन गर्ने समेत तय भएको थिएटरले जनाएको छ ।
