पेरिसको नगरपालिका निर्वाचनमा इमानुएल ग्रेगोइरे विजयी

काठमाडौँ– फ्रान्सको राजधानी पेरिसमा सम्पन्न नगरपालिका निर्वाचनको दोस्रो चरणमा वामपन्थी उम्मेदवार इमानुएल ग्रेगोइरेको नेतृत्वमा रहेको उम्मेदवारको सूची विजयी भएको छ । मतदान सर्वेक्षण संस्था ‘एलाबे’ को प्रारम्भिक अनुमानलाई उद्धृत गर्दै बीएफएम टिभीले ग्रेगोइरेको जितबारे जानकारी दिएको हो ।
सोसलिस्ट पार्टी, द इकोलोजिस्ट्स र फ्रान्सेली कम्युनिष्ट पार्टीको गठबन्धनद्वारा समर्थित ग्रेगोइरेको टोलीले करिव ५० प्रतिशत मत प्राप्त गरेको छ । अर्कोतर्फ, पूर्व संस्कृति मन्त्री रशिदा दातीको नेतृत्वमा रहेको ‘द रिपब्लिकन’ पार्टीको सूचीले करिव ४० प्रतिशत मत प्राप्त गरेको छ । फ्रान्समा हरेक ६ वर्षमा स्थानीय काउन्सिलर, मेयर र अन्य अधिकारीहरू चयन गर्न नगरपालिका निर्वाचन आयोजना गरिन्छ ।
अघिल्ला निर्वाचनहरूको तुलनामा यस वर्षको मतदान प्रणालीमा केही परिवर्तन गरिएको थियो। यस पटक स्वतन्त्र उम्मेदवारहरूलाई चुनावी प्रतिस्पर्धामा उत्रन निषेध गरिएको थियो र मतदाताहरूले व्यक्तिगत उम्मेदवारको सट्टा उम्मेदवारहरूको ‘सूची’ लाई मतदान गरेका थिए । निर्वाचनको नियमअनुसार, पहिलो चरणमा कुनैपनि सूचीले ५० प्रतिशतभन्दा बढी वैध मत प्राप्त गर्न नसकेमा १० प्रतिशतभन्दा बढी मत ल्याउने सूचीहरू दोस्रो तथा अन्तिम चरणका लागि योग्य हुन्छन् ।
अन्तिम चरणमा सापेक्ष बहुमत प्राप्त गर्ने सूची नै विजयी घोषित हुन्छ । राष्ट्रिय तथ्याङ्क तथा आर्थिक अध्ययन संस्थानकाअनुसार फ्रान्समा बसोवास गर्ने ३ लाख ७४ हजार युरोपेली संघका नागरिकसहित करिव ४ करोड ८७ लाख मतदाताहरू मतदानका लागि योग्य रहेका थिए ।