सर्वोच्चको फैसलापछि गगन थापाले भने- पार्टी एकताबद्ध भएर अघि बढ्ने वातावरण बन्यो

काठमाडौं – नेपाली कांग्रेसका सभापति गगन थापाले आधिकारिकतासम्बन्धी सर्वोच्च अदालतको फैसलालाई पार्टी एकताको अवसरका रूपमा लिनुपर्ने बताएका छन् ।शुक्रबार सर्वोच्च अदालतको फैसला आफ्नो पक्षमा आएसँगै थापाले शनिबार बिहान सामाजिक सञ्जालमार्फत यस्तो धारणा व्यक्त गरेका हुन् ।
सभापति थापाले यसलाई कुनै पक्षको जित वा हार नभई विधि, प्रक्रिया र लोकतान्त्रिक अभ्यासको जितका रूपमा व्याख्या गर्दै लेखेका छन्- सम्मानित सर्वोच्च अदालतको निर्णयले पार्टीका सबै साथीहरूलाई एकताबद्ध बनाउँदै पार्टीलाई फेरि बलियो बनाउने साझा यात्रामा अघि बढ्ने वातावरण’ बनाएको छ। यो कुनै जित-हारको विषय होइन, विधि, प्रक्रिया र लोकतान्त्रिक अभ्यासको विषय हो ।’
थापाले अबको प्राथमिकता पार्टीलाई थप बलियो र एकताबद्ध बनाउने साझा अभियान हुनुपर्ने उल्लेख गर्दै देश तथा विदेशमा रहेका सबै पार्टी सदस्य तथा शुभेच्छुकलाई जिम्मेवार र सकारात्मक भूमिका खेल्न आग्रह गरेका छन्।
साथै थापाले कांग्रेसको १५औँ महाधिवेशन प्रक्रिया अघि बढिसकेको उल्लेख गर्दै यसलाई पार्टी रूपान्तरण र सुदृढीकरणको महत्त्वपूर्ण अवसरका रूपमा उपयोग गर्नुपर्नेमा जोड दिएका छन् ।उनले थप लेखेका छन्- ‘पन्ध्रौँ महाधिवेशनको प्रक्रिया अगाडि बढिसकेको छ। महाधिवेशनलाई सफल पार्दै पार्टीलाई रूपान्तरण र सुदृढ बनाउने अवसरका रूपमा उपयोग गरौँ