गाउँपालिका अध्यक्षसहित ३ जनाविरुद्ध सामूहिक बलात्कार मुद्दा

कपिलवस्तु — कपिलवस्तुको शुद्धोधन गाउँपालिकाका अध्यक्ष कमलेश शरण चौधरीसहित तीन जनाविरुद्ध सामूहिक बलात्कारको मुद्दा दर्ता भएको छ ।
जिल्ला सरकारी वकिल कार्यालय रूपन्देहीले नाम परिवर्तन गरिएको ‘भैरहवा–१५’ की एक युवतीमाथि सामूहिक बलात्कार गरेको आरोपमा मुद्दा अघि बढाएको हो ।मुद्दामा राजेश्वर चौधरी, कमलेश शरण चौधरी र सन्तकुमार यादव लाई प्रतिवादी बनाइएको छ। तीमध्ये यादव हाल पूर्वपक्ष (थुनछेक) का लागि रूपन्देही कारागारमा रहेको जनाइएको छ।
पीडित पक्षका अनुसार २०८१ असोज ६ गते उक्त युवतीले सामूहिक बलात्कारको आरोप लगाउँदै किटानी जाहेरी दर्ता गराएकी थिइन् ।अध्यक्ष चौधरी यसअघि पीडितको गोपनीयता भंग गरेको आरोपमा साइबर क्राइम मुद्दामा पक्राउ परेका थिए। तर तत्कालीन अवस्थामा सरकारी वकिल कार्यालयले मुद्दा नचलाउने निर्णय गरेपछि उनले उन्मुक्ति पाएका थिए ।मुद्दा दर्तासँगै गाउँपालिका अध्यक्ष चौधरीको पदसमेत धरापमा परेको छ। ०७९ सालको स्थानीय तह निर्वाचनमा चौधरीले लोसपाबाट गाउँपालिका अध्यक्षमा विजयी भएका थिए।