काठमाडौं – जेनजी आन्दोलन नेपालले पूर्वप्रधानमन्त्री शेरबहादुर देउवालाई त्रिभुवन अन्तर्राष्ट्रिय विमानस्थलबाटै नियन्त्रणमा लिएर सार्वजनिक रूपमा उठेका आरोपबारे निष्पक्ष अनुसन्धान अघि बढाउन सरकारसँग माग गरेको छ।
जेनजी आन्दोलन नेपालका विजय शाहले जारी गरेको प्रेस वक्तव्यमा देउवाको निवासबाट स्वदेशी तथा विदेशी ठूलो परिमाणमा रकम भेटिएको भन्ने सार्वजनिक विवरणबारे तत्काल छानबिन गर्न माग गरिएको छ। वक्तव्यमा देउवामाथि उठेका प्रश्नहरूको निष्पक्ष, पारदर्शी र कानुनसम्मत अनुसन्धान हुनुपर्ने उल्लेख छ।
आन्दोलन पक्षले वाइडबडी, एनसेल, नक्कली भुटानी शरणार्थी तथा मेलम्चीलगायत विभिन्न प्रकरणको समेत अनुसन्धान गर्न माग गरेको छ। ती प्रकरणमा देउवा दोषी देखिए कानुनबमोजिम कारबाही हुनुपर्ने उसको भनाइ छ।
वक्तव्यमा भनिएको छ, “कानुन सबैका लागि बराबर हो भने देउवालाई विमानस्थलबाटै कानुनबमोजिम नियन्त्रणमा लिएर अनुसन्धान अघि बढाइनुपर्छ।”
जेनजी आन्दोलन नेपालले राजनीतिक संरक्षणका नाममा अनुसन्धान प्रभावित पार्न खोजिए त्यसको प्रतिरोध गर्ने चेतावनीसमेत दिएको छ। आन्दोलनका क्रममा ७६ जनाको ज्यान गएको र हजारौँ युवा घाइते भएको उल्लेख गर्दै उसले विगतको दण्डहीनता दोहोरिए जनविश्वास थप कमजोर हुने बताएको छ।
विमानस्थलमा उपस्थित हुन आह्वान
देउवा नेपाल फर्किन लागेको भन्दै जेनजी पक्षले आफ्ना समर्थकलाई आज बिहान ११ बजे त्रिभुवन अन्तर्राष्ट्रिय विमानस्थलमा उपस्थित हुन आह्वान गरेको छ।
विमानस्थलमा शान्तिपूर्ण रूपमा उपस्थित भएर सरकारलाई निष्पक्ष अनुसन्धानका लागि दबाब दिने आन्दोलन पक्षको भनाइ छ। कार्यक्रम शान्तिपूर्ण हुने दाबी गर्दै उसले राज्यका तर्फबाट कुनै दमन भए त्यसको जिम्मेवारी सरकारले लिनुपर्ने चेतावनी दिएको छ।
विमानस्थलमा सुरक्षा बढाउने तयारी
यसैबीच, देउवाको आगमनलाई लक्षित गर्दै सरकारले त्रिभुवन अन्तर्राष्ट्रिय विमानस्थलमा सुरक्षा व्यवस्था कडा बनाउने तयारी गरेको बताइएको छ।
सम्भावित भीड तथा सुरक्षा चुनौतीलाई ध्यानमा राख्दै विमानस्थल क्षेत्रमा सुरक्षा निकायको उपस्थिति बढाउने तयारी भइरहेको जनाइएको छ।
जेनजी पक्षले भने आफ्नो प्रदर्शन शान्तिपूर्ण हुने र निष्पक्ष अनुसन्धानको मागमा केन्द्रित रहने जनाएको छ।
Discussion about this post