काठमाडौँ- अन्तरिम सरकारका स्वास्थ्य तथा जनसंख्यामन्त्री डा. सुधा गौतमले नेपाली औषधि उद्योगहरूलाई ‘म्यासिभ प्रोडक्सन’ (व्यापक उत्पादन) तर्फ लाग्न र देशलाई औषधिमा आत्मनिर्भर बनाउन आग्रह गर्नुभएको छ ।
नेपालमा औषधि उद्योगको धेरै विकास भएपनि अझै थुप्रै काम गर्न बाँकी रहेको भन्दै उहाँले सरकारले यस क्षेत्रलाई आक्रामक रूपमा सहयोग गर्ने प्रतिवद्धता जनाउनुभएको हो । फार्मा एक्स्पोलाई सम्बोधन गर्दै मन्त्री गौतमले नेपालका औषधि उद्योगहरूको स्तर वृद्धि गर्नुपर्ने आवश्यकता औंल्याउनु भयो ।
हाल नेपालमा करिव ८८ वटा औषधि उत्पादक कम्पनीहरू रहेको र तीमध्ये ५० वटाले विश्व स्वास्थ्य संगठनको असल उत्पादन अभ्यास (डब्लुएचओ जिएमपी) प्रमाणपत्र पाएको बताउनु भयो । उहाँले यसलाई अझै परिष्कृत गर्नुपर्ने बताउनु भयो । । आफू विगतमा स्वास्थ्य सचिव हुँदा पनि औषधि उत्पादक संघ (एपोन) लगायतका संस्थाहरूलाई उत्पादन बढाउन आग्रह गरेको स्मरण गर्दै उहाँले उद्योगहरू ‘अन्डर प्रोडक्सन’ (कम उत्पादन) मा बस्न नहुने बताउनु भयो । मन्त्री भएर आउनासाथै आफूले एपोन, एनसिडिए लगायतका सरोकारवाला निकायलाई बोलाएर छलफल गरेको र उद्योगीका समस्या समाधान गर्न सरकार तयार रहेको उहाँले बताउनु भयो ।
उहाँले भन्नुभयो, जिएमपी सर्टिफाइड भनेको कस्तो हो भनेर मैले बुझ्दा एकजनाले मलाई एसईई पास गरेजस्तै हो भन्नुभयो । कोही ‘जस्ट पास’ हुन्छन्, कोही ‘डिस्टिङ्सन’ ल्याएर पास हुन्छन् । हाम्रा उद्योगहरू डब्लुएचओ जिएमपी त छन्, तर अब ती ‘जस्ट पास’ मात्रै भएर भएन, तिनलाई ‘डिस्टिङ्सन’को लेभलमा कसरी पु¥याउने भन्ने मुख्य कुरा हो । तपाईंहरूको उद्योग किन यति कम उत्पादनमा बस्ने ? म्यासिभ प्रोडक्शन गर्नुपर्छ, स्वदेशी उद्योगहरू आत्मनिर्भर बन्नुपर्छ ।’
उहाँले नेपालका केही निजी क्षेत्रका प्रयोगशालाहरू ‘स्टेट अफ द आर्ट’ (अत्याधुनिक र उत्कृष्ट) रहेको भन्दै प्रशंसा समेत गर्नुभयो । निजी क्षेत्रले गरिरहेको राम्रो कामलाई सरकारले नीतिगत रूपमै संरक्षण गर्ने र गुणस्तरमा कुनै सम्झौता नगरी अगाडि बढ्ने मन्त्री गौतमको भनाइ छ ।
