अविरल वर्षाले देशभरका प्रमुख सडक प्रभावित, विभि�

काठमाडौं – अविरल वर्षाका कारण देशका विभिन्न स्थानमा पहिरो, बाढी तथा सडक कटान हुँदा प्रमुख राजमार्गसहित विभिन्न सडकखण्डमा यातायात प्रभावित भएको छ।

नेपाल प्रहरीले शुक्रबार बिहान ९ बजेसम्मको विवरण सार्वजनिक गर्दै विभिन्न जिल्लाका सडकमा यातायात अवरुद्ध भएको जनाएको हो। केही सडकखण्डमा रातिको समयमा सवारीसाधन सञ्चालनमा रोक लगाइएको छ भने कतिपय स्थानमा पहिरो र सडक कटानका कारण पूर्ण रूपमा यातायात बन्द भएको प्रहरीले जनाएको छ।

काभ्रेपलाञ्चोक र सिन्धुली जोड्ने बीपी राजमार्गअन्तर्गत खुर्कोट–नेपालथोक–कटुन्जेबेँसी सडकखण्डमा सम्भावित बाढीको जोखिमलाई मध्यनजर गर्दै राति ६ बजेदेखि बिहान ४ बजेसम्म सबै प्रकारका सवारीसाधनको आवतजावत रोकिएको छ। उक्त सडकखण्डमा बिहान ४ बजेदेखि बेलुका ६ बजेसम्म भने यातायात सञ्चालन हुने व्यवस्था गरिएको छ।

त्यस्तै, मकवानपुरको कान्ति लोकपथमा पनि वर्षाका कारण रातिको समयमा सवारीसाधन सञ्चालनमा रोक लगाइएको छ। प्रहरीले बेलुका ५ बजेदेखि बिहान ५ बजेसम्म उक्त सडकमा आवागमन रोकिएको जनाएको छ।

इलाम नगरपालिका–९ राजदुवालीस्थित मेची राजमार्ग सडकमा अत्यधिक हिलो भएपछि पूर्ण रूपमा अवरुद्ध भएको छ। उक्त क्षेत्रमा वैकल्पिक सडक भने सञ्चालनमा रहेको प्रहरीले जनाएको छ।

सिन्धुपाल्चोकमा अरनिको राजमार्ग पनि विभिन्न स्थानमा पहिरोका कारण प्रभावित भएको छ। भोटेकोशी गाउँपालिका–४ चारकिलोमा पहिरो खसेपछि सडक पूर्ण रूपमा अवरुद्ध भएको छ। भोटेकोशी–२ कोदारीस्थित इकुमा ढुङ्गा, माटो तथा लेदोसहितको पहिरो खसेर सडक अवरुद्ध भएको छ भने सोही वडाको लिपिङमा सडक भासिएपछि राजमार्गको आवागमन रोकिएको छ।

रसुवाको उत्तरगया गाउँपालिका–५ खाल्टेमा त्रिशूली नदीले सडक कटान गरेपछि त्रिशूली–मैलुङ–स्याफ्रुबेशी जाने कच्ची सडक पूर्ण रूपमा अवरुद्ध भएको छ।

पश्चिम नेपालका सडकमा पनि वर्षाजन्य विपद्को असर परेको छ। रुकुम पश्चिमको आठबिसकोट नगरपालिका–६ रिजेगार्ड खोलास्थित भेरी करिडोरअन्तर्गत जाजरकोट–डोल्पा सडक पहिरोका कारण अवरुद्ध भएको छ।

रुकुम पूर्वको भूमे गाउँपालिका–४ काडाबगर र भूमे–५ धौलापहिरामा मध्यपहाडी लोकमार्ग पहिरोका कारण पूर्ण रूपमा बन्द भएको प्रहरीले जनाएको छ।

लमजुङमा मध्यपहाडी लोकमार्गअन्तर्गत मध्यनेपाल नगरपालिका–१० बिमिरेभञ्ज्याङ र बेँसीसहर–मनाङ सडकअन्तर्गत बेँसीसहर नगरपालिका–६ खरखरे भीरमा पहिरो खसेपछि दुवै सडकखण्ड पूर्ण रूपमा अवरुद्ध भएका छन्।

त्यसैगरी, म्याग्दीको बेनी–जोमसोम सडक पनि पहिरोका कारण पूर्ण रूपमा अवरुद्ध भएको छ। रघुगङ्गा गाउँपालिका–२ बैँसेरी र अन्नपूर्ण गाउँपालिका–७ महभीरमा पहिरो खसेपछि सडकमा यातायात सञ्चालन हुन नसकेको प्रहरीले जनाएको छ।

लगातारको वर्षाका कारण पहिरो खस्ने, नदी तथा खोलाले सडक कटान गर्ने र सडक हिलाम्मे हुने क्रम बढेपछि देशका विभिन्न क्षेत्रमा यातायात प्रभावित भएको हो।

प्रहरीका अनुसार अवरुद्ध सडकखण्डमा पहिरो तथा माटो हटाएर सडक सञ्चालनमा ल्याउने प्रयास भइरहेको छ। वर्षा निरन्तर भइरहेकाले सडकको अवस्था जुनसुकै बेला थप बिग्रन सक्ने भन्दै प्रहरीले यात्रुलाई सावधानी अपनाउन र आवश्यकताअनुसार वैकल्पिक मार्ग प्रयोग गर्न आग्रह गरेको छ।

यात्रा गर्नुअघि सम्बन्धित निकायबाट सडकको पछिल्लो अवस्थाबारे जानकारी लिएर मात्र गन्तव्यतर्फ जान प्रहरीले सुझाव दिएको छ।