काठमाडौं- लगातारको वर्षाका कारण देशका विभिन्न जिल्लाका प्रमुख राजमार्ग तथा सडकखण्डमा पहिरो, बाढी र सडक कटान भएपछि यातायात सेवा प्रभावित भएको छ। नेपाल प्रहरीले शुक्रबार बिहान ५ बजेसम्मको विवरण सार्वजनिक गर्दै एक दर्जनभन्दा बढी प्रमुख सडकखण्डमा आवागमन अवरुद्ध भएको जनाएको छ।
प्रहरीका अनुसार बिपी राजमार्गअन्तर्गत काभ्रेपलाञ्चोक–सिन्धुली जोड्ने खुर्कोट–नेपालथोक–कटुन्जेबेँसी सडकखण्डमा बाढीको उच्च जोखिम रहेकाले साँझ ६ बजेदेखि बिहान ४ बजेसम्म सबै प्रकारका सवारीसाधन सञ्चालनमा रोक लगाइएको छ। उक्त सडकखण्डमा बिहान ४ बजेदेखि साँझ ६ बजेसम्म मात्र सवारी सञ्चालन गर्न अनुमति दिइएको छ।
यस्तै, कान्ति लोकपथमा पनि वर्षाका कारण साँझ ५ बजेदेखि बिहान ५ बजेसम्म यातायात सञ्चालनमा पूर्ण प्रतिबन्ध लगाइएको प्रहरीले जनाएको छ।
अरनिको राजमार्गअन्तर्गत सिन्धुपाल्चोकको जिरोकिलो, कोदारी र लिपिङ क्षेत्रमा पहिरो खस्नुका साथै सडक भासिएकाले आवतजावत पूर्ण रूपमा अवरुद्ध भएको छ। त्यसैगरी, लामासाँघु–रामेछाप सडकखण्डको दोलखास्थित किर्नेटारमा सामाकोशी खोलाले सडक बगाएपछि यातायात प्रभावित भएको छ। हाल खिम्ती ग्रामीण विद्युत् सहकारी संस्थाको परिसर हुँदै वैकल्पिक मार्ग सञ्चालनमा ल्याइएको छ।
मेची राजमार्गको इलामस्थित राजदुवालीमा सडक हिलाम्मे भएपछि यातायात अवरुद्ध भए पनि वैकल्पिक मार्ग प्रयोग भइरहेको छ। म्याग्दीको बैसेरी र भिरकाटे तथा मुस्ताङको कैकु खोलामा पहिरो जाँदा बेनी–जोमसोम सडकखण्डका विभिन्न स्थानमा यातायात प्रभावित भएको छ।
यसैगरी, रसुवाको पासाङ ल्हामु सडक, मुगुको नाग्म–गमगढी सडक, बागलुङको कालीगण्डकी करिडोर (बेलबगर), रुकुम पश्चिमको भेरी करिडोर (रिजेगार्ड) तथा गुल्मीको मदन भण्डारी सडकखण्ड (लेख) मा सुक्खा पहिरो खस्दा यातायात पूर्ण रूपमा अवरुद्ध भएको प्रहरीले जनाएको छ।
नेपाल प्रहरीले वर्षायाममा पहिरो, बाढी र सडक कटानको जोखिम कायम रहेकाले यात्रा गर्नुअघि सम्बन्धित निकाय वा प्रहरीबाट सडकको अवस्थाबारे जानकारी लिएर मात्रै यात्रा गर्न सर्वसाधारणलाई आग्रह गरेको छ।
Discussion about this post