प्रतिनिधिसभा निर्वाचन सफलतापूर्वक सम्पन्न भएकोमा भारतले नेपाललाई दियो बधाई

काठमाडौं– भारतले नेपालमा बिहीबार सम्पन्न प्रतिनिधिसभा सदस्य निर्वाचन सफलतापूर्वक सम्पन्न भएकोमा स्वागत गर्दै बधाई व्यक्त गरेको छ।
भारतीय विदेश मन्त्रालयका प्रवक्ता रणधीर जैसवालले सञ्चारकर्मीहरूसँगको प्रतिक्रिया दिँदै भने,’नेपालमा निर्वाचन सफलतापूर्वक सम्पन्न गर्न तथा नेपाली जनताले उत्साहजनक सहभागिता जनाएर आफ्नो प्रजातान्त्रिक अधिकार अभ्यास गरेकोमा हामी स्वागत गर्छौं।’प्रवक्ता जैसवालले गत वर्षका असामान्य घटनाक्रमको पृष्ठभूमिमा निर्वाचन सफलतापूर्वक सम्पन्न भएकोमा प्रधानमन्त्री सुशीला कार्की, नेपाल सरकार, नेपाली जनता र सबै सरोकारवालालाई बधाई दिएको बताए।
साथै, उनले नेपालमा शान्ति, समृद्धि र स्थिरताका लागि भारतले निरन्तर सहयोग गर्दै आएको पनि जनाए। जैसवालका अनुसार, ‘आफ्नो प्रतिबद्धताअनुरूप यस निर्वाचनमा पनि नेपाल सरकारको आग्रहमा भारतले आवश्यक सामग्रीहरू उपलब्ध गराएको थियो।’उनले दुई देशबीचको सम्बन्धलाई थप सुदृढ बनाउन र नागरिकहरूको आपसी हितका लागि नेपालमा बन्ने नयाँ सरकारसँग मिलेर काम गर्न भारत तयार रहेको पनि स्पष्ट पारे।