काठमाडौं – विश्व स्वास्थ्य संगठन (डब्ल्यूएचओ)ले भारतमा पुष्टि भएको निपाह भाइरसका दुई मामिलाबाट अरू देशमा संक्रमण फैलने जोखिम अत्यन्तै कम रहेको जनाएको छ ।
डब्ल्यूएचओले यसै आधारमा भारतमाथि यात्रा वा व्यापारिक प्रतिबन्ध लगाउन आवश्यक नरहेको र त्यस्तो सुझाव पनि नदिइने स्पष्ट पारेको छ ।
भारतसँग यस्ता प्रकोप नियन्त्रण गर्ने पर्याप्त क्षमता रहेको डब्ल्यूएचओले उल्लेख गरेको छ । भारतीय स्वास्थ्य अधिकारीहरूसँग संगठन निरन्तर समन्वयमा रहेको डब्ल्यूएचओले जनाएको छ ।
भारतको पश्चिम बंगाल राज्यमा गएको डिसेम्बर अन्तिम साता निपाह भाइरसका दुई मामिला देखिएको थियो । त्यहाँको केन्द्रीय स्वास्थ्य मन्त्रालयले हालै सार्वजनिक गरेको प्रतिवेदनानुसार, संक्रमित व्यक्तिको सम्पर्कमा आएका १९६ जनालाई पहिचान गरी परीक्षण गरिएको थियो । तीमध्ये कसैमा पनि भाइरसको संक्रमण पाइएन ।
भारत सरकारले निपाह भाइरसको फैलावटलाई पूर्ण रूपमा नियन्त्रणमा लिइसकेको दाबी गरेको छ ।
भाइरस फैलन सक्ने आशंकामा हङकङ, मलेसिया, सिंगापुर, भियतनाम, थाइल्यान्डलगायत देशले आफ्ना विमानस्थलहरूमा यात्रुको स्क्रिनिङ (स्वास्थ्य जाँच) सुरु गरेका छन् ।
निपाह भाइरस फलफूल खाने चमेरो र सुँगुरजस्ता जनावरहरूबाट मानिसमा सर्ने डब्ल्यूएचओले जनाएको छ ।
यो भाइरस संक्रमितको मृत्युदर ४० देखि ७५ प्रतिशतसम्म छ । हालसम्म यो भाइरसविरुद्ध कुनै खोप वा प्रभावकारी औषधि छैन ।
