काठमाडौँ-राजस्थान रोयल्सले मुम्बई इण्डियन्सलाई हराएको छ। इण्डियन प्रिमियर लिग (आईपीएल) अन्तर्गत गुवाहटीस्थित बासपरा क्रिकेट मैदानमा सम्पन्न खेलमा राजस्थानले मुम्बईलाई २७ रनले हराएको हो।वर्षाका कारण खेल निकैबेर प्रभावित भएपछि ११ ओभरमा खेल झारिएको थियो। जसमा टस हारेर ब्याटिङमा उत्रिएको राजस्थानले ३ विकेट गुमाएर १५० रन बनायो। राजस्थानका लागि यशस्वी जसवालले सर्वाधिक अविजित ७७ रन बनाउने क्रममा ३२ बलमा १० चौका र ४ छक्का प्रहार गरे। त्यस्तै, वैभव सूर्यवंशीले ३९ रन बनाउँदा कप्तान रियान परागले २० रन बनाए। बलिङमा मुम्बईका एएम गजन्फरले २ तथा सार्दुल ठाकुरले १ विकेट लिए।
जवाफी ब्याटिङमा उत्रिएको मुम्बई ९ विकेट गुमाएर १२३ रनमा समेटियो। मुम्बईका लागि नमन धीर र सर्फेन रुथरफोर्डले समान २५ रन बनाउँदा तिलक वर्माले १४ रन बनाए। बलिङमा राजस्थानका रवि विश्नोइ, नान्द्रे बर्गर र सन्दीप शर्माले समान २ विकेट लिँदा जोफ्रा आर्चर र तुषार देशपाण्डेले समान १ विकेट लिए।लगातार तेस्रो खेलमा जित निकालेको राजस्थान ६ अंकसहित तालिकाको शीर्षस्थानमा उक्लिएको छ।आज आईपीएलमा एक खेल हुँदैछ। दिल्ली क्यापिटल्स र गुजरात टाइटन्स आज दिल्लीस्थित अरुण जेट्ली स्टेडियममा भिड्नेछन्।
