पश्चिम नवलपरासी – पश्चिम नवलपरासीको रामग्राम नगरपालिका-१८ पण्डितपुरमा कुषाणकालीन तामाका सिक्का र विभिन्न पुरातात्विक सामग्री फेला परेका छन् ।पुरातत्व विभागले गरेको उत्खननमा बुद्धकालीन सहरको थप संरचना फेला परेको हो । यस अगाडि गरिएको जियो फिजिक्स सर्भेले पहिचान गरेको भन्दा नयाँ स्थानमा उत्खनन गर्दा कुषाणकालीन तामाका सिक्का र विभिन्न पुरातात्विक सामग्री फेला परेको पुरातत्वविद् भाष्कर ज्ञवालीले बताउनुभयो ।
अघिल्लो वर्ष भएको उत्खननमा जमिनमुनि चक्र आकारमा व्यवस्थित सहरको संरचना भेटिएको वस्तुलाई बेलायतमा लगेर परीक्षण गरिएको थियो । अध्ययनका क्रममा पण्डितपुरमा भेटिएका संरचना इशापूर्व छैटौँ शताब्दीका पुष्टि भएको र त्यसको संरक्षणको लागि तीनै तहको सरकार लागि पर्नुपर्ने रामग्राम नगरपालिकाका प्रमुख धनपत यादवले बताउनुभयो ।
यो क्षेत्रमा भेटिएको वस्तुको वैज्ञानिक परीक्षणमा छैटौं शताब्दीको संरचना भेटिएकाले पण्डितपुर महत्वपूर्ण पुरातात्विकस्थल भएको पुष्टि भएको छ । पण्डितपुरलाई कोलीय गणराज्यको राजधानीका साथै बुद्धको मावलीको रूपमा दाबी गरिँदै आएको छ ।
