काठमाडौं – रुसी राष्ट्रपति भ्लादिमिर पुटिन बिहीबार साँझ दुईदिने भारत भ्रमणमा पुगेका छन् । उनीसँगै सातजना मन्त्रीहरूको ठूलो प्रतिनिधिमण्डल पनि आएको छ ।
भारतीय प्रधानमन्त्री मोदी स्वयम् पुटिनलाई विमानस्थलमा स्वागत गर्न पुगेका थिए ।
दुवै नेताले एकअर्कालाई अङ्गालो हालेका थिए र मोदी तथा पुटिन एउटै गाडीमा बसेर विमानस्थलबाट प्रधानमन्त्री निवास पुगेका थिए ।
मोदीको निमन्त्रणामा आयोजित २३औँ भारत–रुस वार्षिक शिखर सम्मेलनको क्रममा, दुई नेताहरूबीच रक्षा सहयोगलाई सुदृढ पार्ने, द्विपक्षीय व्यापारलाई बाह्य दबाबबाट जोगाउने र साना मोड्युलर रिएक्टरहरूमा साझेदारी गर्ने विषयमा छलफल हुने अपेक्षा गरिएको भारतीय सञ्चारमाध्यमहरुले जनाएका छन् ।
मोदी र पुटिनबीच आज दुई महत्वपूर्ण बैठकहरू हुँदैछन्, जसमध्ये एउटा बैठक बन्द कोठामा हुने बताइएको छ ।
दुई नेताबीचको द्विपक्षीय भेटघाटको क्रममा भारत र रुसबीच २५ भन्दा बढी सम्झौताहरू माथि हस्ताक्षर हुने सम्भावना छ ।
आज बिहान ९ बजे भारतको राष्ट्रपति भवनमा पुटिनलाई राजकीय स्वागत गरिएको छ । त्यसपछि उनले राजघाट गएर महात्मा गान्धीलाई श्रद्धाञ्जली अर्पण गर्नेछन् भने बिहान ११ बजे हैदराबाद हाउसमा २३औँ भारत–रुस वार्षिक शिखर सम्मेलन आयोजना हुनेछ ।
मोदी र पुटिनले आज साँझ एक व्यापारिक फोरमलाई पनि सम्बोधन गर्नेछन् । आज साँझ पुटिनको सम्मानमा भारतीय राष्ट्रपति द्रौपदी मुर्मूले राजकीय रात्रिभोज दिने बताइएको छ ।
यसैबीच पुटिन भारत भ्रमणमा दिल्ली ओर्लेपछि बिहीबार मोदीले उनलाई रुसी भाषामा लेखिएको गीताको एक प्रति उपहार दिएका छन् । प्रधानमन्त्री मोदीले सामाजिक सञ्जाल प्लेटफर्म एक्समा लेख्दै भनेका छन्, “राष्ट्रपति पुटिनलाई रुसी भाषामा लेखिएको गीताको एक प्रति उपहार दिएँ । गीताको शिक्षाले विश्वभरका लाखौं मानिसहरूलाई प्रेरणा दिन्छ ।”
