नाडाका नवनिर्वाचित पदाधिकारीको पदभार तथा शपथ कार्यक्रम सम्पन्न

काठमाडौँ – नाडा अटोमोबाइल्स एसोसिएसन अफ नेपाल (नाडा) का नवनिर्वाचित पदाधिकारीको पदभार हस्तान्तरण तथा शपथ ग्रहण कार्यक्रम सम्पन्न भएको छ । विहिबार नाडाको केन्द्रीय कार्यसमितिको पहिलो बैठकमा निवर्तमान अध्यक्ष करण चौधरीले नवनिर्वाचित अध्यक्ष सुरेन्द्रकुमा उप्रेतीलाई औपचारिक रूपमा पदभार हस्तान्तरण गरेका हुन् । सो अवसरमा चौधरीले उप्रेतीलाई सफल कार्यकालको शुभकामना दिँदै नाडाको संस्थागत विकास र अटोमोबाइल क्षेत्रको उन्नयनमा उनको नेतृत्व महत्वपूर्ण हुने विश्वास व्यक्त गरेका थिए ।
कार्यक्रममा अध्यक्ष उप्रेतीले पद तथा गोपनीयताको सपथ ग्रहण गर्दै आफ्नो कार्यकालमा नाडाको उद्देश्य, विधान र मूल्य-मान्यताअनुसार संस्थालाई अझ सशक्त, सक्रिय र प्रभावकारी बनाउने प्रतिबद्धता व्यक्त गरेका थिए । उनले अटोमोबाइल व्यवसायीहरूको हकहित संरक्षण, क्षेत्रको विकास तथा सम्बन्धित निकायसँग सहकार्य गर्दै अघि बढ्ने धारणा राखेका थिए ।
उक्त बैठकमै अध्यक्ष उप्रेतीले नाडा विधान २०७८ अनुसार महेश पाल, दीपककुमार अग्रवाल र राजेश गिरीलाई केन्द्रीय कार्यसमितिको सदस्यमा मनोनयन गरेका छन् । उनले मनोनित सदस्यलाई स्वागत गर्दै आगामी गतिविधिमा सक्रिय भूमिका निर्वाह गर्ने अपेक्षा व्यक्त गरेका छन् ।
नाडाको केन्द्रीय कार्यसमितिले निकट भविष्यमा पदाधिकारी चयनका लागि निर्वाचन प्रक्रिया सम्पन्न गर्ने निर्णय पनि गरेको छ । आगामी दिनमा अटोमोबाइल क्षेत्रको विकास, व्यवसायीहरूको हित संरक्षण र नीतिगत सहकार्यलाई थप सुदृढ गर्दै अघि बढ्ने विश्वास व्यक्त गरिएको छ ।