चितवन. निर्दोष जीवनको उपन्यास ‘नोस्टाल्जिया’ विमोचन भएको छ । वरिष्ठ कवि एवम् साहित्यकार गोविन्दराज विनोदी, एलबी क्षेत्री, नीलम कार्की निहारिका, सिर्जन अविरल र जयराज रेग्मी मगरले पुस्तक विमोचन गरेका हुन् ।
विमोचन गरिएको पुस्तकका सन्दर्भमा आख्यानकार नीलम कार्की निहारिका र सिर्जन अविरलले टिप्पणी राखेका थिए। नेपाली समाजमा व्याप्त पितृसत्ताको कालो छायालाई उपन्यासमा गम्भीररूपमा उठाइएको वक्ता अविरलले बताए । ‘क्रुर पितृसत्ताको आक्रमण कति भयावह छ भन्ने कुरा उपन्यासमा छ’, अविरलले सुनाए ।
कार्यक्रममा प्रमुख अतिथि रहेका कविडाँडा साहित्य समाजका अध्यक्ष एलबी क्षेत्रीले उपन्यासमा लेखक निर्दोष जीवनकै संघर्षको कहानी भएको बताए । ‘बाल्यकालमा भोग्नुपरेको नमीठो यथार्थलाई लेखकले नढाँटिकन पुस्तकमा लेखेका छन्’ क्षेत्रीले भने । लेखक निर्दोष जीवनले पुस्तकको कथाबस्तु आफ्नै परिवारभित्रको भएको बताउँदै पुस्तकमा अधिकांश सत्य घटना तथा थोरै मात्र काल्पनिकता बुनिएको बताए । कार्यक्रमका सभापति गोविन्दराज विनोदीले निर्दोष जीवनले कविता, मुक्तक, गीत, गजल हुँदै कथा लेखेर अहिले उपन्याससम्म आइपुग्दा लेखनमा निकै सुधार गरेको बताए ।
नोस्टाल्जियामा एक जना संघर्षरत युवाको भोगाइ, पारिवारिक साथ सहयोग र मतान्तर तथा प्रेमका विषयलाई समेटेको लेखक निर्दोष जीवनले बताए । ‘तिरस्कारलाई संघर्षले जित्न खोज्नेको कथा यसमा छ’ उपन्यासबारे उनले भने ।
चार वटा गीति एल्बम र ४ वटा पुस्तक निकालिसकेका निर्दोष जीवनको नोस्टाल्जिया नवौं कृति हो । इन्डिगो इन्कबाट प्रकाशित पुस्तकको मूल्य ३९९ छ ।
