१२ बुँदे घोषणापत्रसहित एनआरएनएको विश्व सम्मेलन सकियो, शर्मा अध्यक्षमा निर्विरोध

काठमाडौं – १२ बुँदे घोषणापत्र सार्वजनिक गर्दै गैरआवासीय नेपाली संघ (एनआरएनए) को विश्व सम्मेलन तथा बृहत् अन्तर्राष्ट्रिय महाधिवेशन सम्पन्न भएको छ।‘हाम्रो एकता, समृद्धिको आधार’ भन्ने मूल नारासहित फागुन ३० देखि चैत २ गतेसम्म काठमाडौंमा आयोजित सम्मेलनले विश्वभर रहेका नेपाली समुदायबीच एकता सुदृढ गर्दै लगानी विस्तार र नेपालको समृद्धिका लागि सहकार्यलाई प्राथमिकता दिने प्रतिबद्धता व्यक्त गरेको छ।
महाधिवेशनले डा. हेमराज शर्माको अध्यक्षतामा नयाँ कार्यसमिति निर्विरोध चयन गरेको छ। सम्मेलनमा विभिन्न देशमा बसोबास गर्ने गैरआवासीय नेपाली, नीति–निर्माता, लगानीकर्ता, श्रमिक प्रतिनिधि, युवा, सञ्चारकर्मी तथा सरोकारवालाहरूको सक्रिय सहभागिता रहेको आयोजकले जनाएको छ।
आयोजकका अनुसार सम्मेलनमा चार हजार दुई सय ८६ प्रतिनिधि सहभागी भएका थिए। तीमध्ये चार सयभन्दा बढी प्रतिनिधि काठमाडौंमा प्रत्यक्ष उपस्थित भएका थिए भने बाँकी सहभागीहरू अनलाइन माध्यमबाट जोडिएका थिए।
सम्मेलनले गैरआवासीय नेपालीहरूको लगानी नेपालमा भित्र्याउन सहज र अनुकूल वातावरण निर्माण गर्न सरकारसँग आग्रह गरेको छ। रोजगारी सिर्जना, उद्यमशीलता विकास तथा भौतिक पूर्वाधार निर्माणमा योगदान पुर्‍याउने गरी एनआरएन लगानीलाई प्रोत्साहन गर्ने प्रतिबद्धता घोषणापत्रमा व्यक्त गरिएको छ।
त्यसैगरी, लगानी व्यवस्थापनलाई सहज बनाउन छुट्टै संयन्त्र स्थापना गर्न तथा सम्बन्धित कानुनहरूमा सुधार गर्न सरकारसँग माग गरिएको छ। नागरिकता ऐन, आयकर ऐन, विदेशी लगानी तथा प्रविधि हस्तान्तरण ऐन लगायतका कानुन संशोधन गरी लगानी प्रक्रिया सहज बनाउनुपर्ने सुझाव सम्मेलनले दिएको छ।
नेपाल सरकार र गैरआवासीय नेपालीको संयुक्त लगानीमा स्थापना भएको एनआरएन नेपाल डेभलपमेन्ट फण्डबाट जारी हुने धितोपत्रको सीमा ८५ प्रतिशत कायम गर्न पनि सम्मेलनले माग गरेको छ। यसबाट विदेशमा रहेका नेपालीहरूको लगानीलाई औपचारिक रूपमा नेपालको आर्थिक विकाससँग जोड्ने विश्वास व्यक्त गरिएको छ।