काठमाडौँ – २१ फागुनमा हुने प्रतिनिधिसभा चुनावमा भाग लिन इच्छुक दलको संख्या १०८ पुगेको छ ।
निर्वाचन आयोगका प्रवक्ता नारायणप्रसाद भट्टराईका अनुसार बिहीबार बेलुकीसम्म निर्वाचन प्रयोजनका लागि दल दर्ता गर्ने दलको संख्या १०८ पुगेको हो ।
निर्वाचन प्रयोजनका लागि दल दर्ता गर्ने समय थपिएर आइतबारसम्म कायम गरिएको छ । यस अवधिभित्र अझ केही दल दर्ता प्रक्रिया पूरा गर्न सक्ने सम्भावना रहेको छ । यसैबीच निर्वाचन आयोगमा दल दर्ताको प्रक्रियामा रहेका दलको संख्या १६ रहेको छ । ती दलले आधिकारिता पाएपनि निर्वाचन प्रयोजनका लागि दर्ता गर्न सक्नेछन् ।
अघिल्लो प्रतिनिधिसभा चुनाव ४ मंसिर २०७९ मा ८४ वटा दलले भाग लिएका थिए । यसपटक दर्ता हुने दलको संख्या उल्लेख्य बढेको देखिएको छ ।
निर्वाचन आयोगमा हालसम्म दर्ता भएका दलको कुल संख्या १३९ पुगेको छ । बिहीबार माधवप्रसाद खतिवडाको नागरिक बचाउ दल नेपाल र प्रकाश खड्काको नेपाल जनसेवा पार्टी दर्ता भएका छन् ।
यसअघि बुधबार सबिन सिग्देलको प्रगतिशील नागरिक पार्टी, दीपककुमार साहको सर्वोदय पार्टी, तथा सर्वेन्द्र खनालको समुन्नत नेपाल पार्टी दर्ता भएका थिए । यससँगै जेनजी आन्दोलनपछि दर्ता भएका नयाँ दलको संख्या २३ पुगेको छ ।
