काठमाडौँ ३०, फागुन,—पारिजात स्मृति केन्द्रले साहित्यकार पारिजातको ८८ औं जन्मजयन्तीका अवसरमा विभिन्न विधाका स्रष्टालाई सम्मानको घोषणा गरेको छ । केन्द्रका अनुसार कवि विनोदविक्रम केसीलाई पारिजात सिर्जन सम्मान– २०७८ प्रदान गरिने भएको छ ।
केसीका …भोकको क्षेत्रफल’कवितासंग्रह र …भेन्टिलेटरमा आमा’ निबन्धसंग्रह प्रकाशित छन् । अनुवाद र सम्पादनमा पनि आबद्ध उनको सहअनुवादमा अरुन्धती रोयको किताब ‘ती विद्रोही ती महात्मा’ प्रकाशित छ ।
यसैगरी, बालसाहित्य सम्मानबाट प्रा. भिक्टर प्रधान, पारिजात कला सम्मानबाट कलाकार देवेन्द्र थुम्केली, पारिजात संघर्षशील नारी सम्मानबाट संघर्षशील महिला उमा गुरुङ राई सम्मानित हुने भएका छन् ।
सबै सम्मान पारिजातको स्मृति दिवसका अवसरमा २०७९ वैशाख ५ गते प्रदान गरिने केन्द्रले जनाएको छ ।
