काठमाडौं – अमेरिकी राष्ट्रपति डोनाल्ड ट्रम्पले रुस र युक्रेन दुवै वर्तमान संघर्ष अन्त्य गर्नका लागि सम्झौता गर्न इच्छुक रहेको बताएका छन् । उनले सम्झौता गराउने प्रयास ‘धेरै हदसम्म सफल’ भइसकेको दाबी गरे ।
दाभोसमा आयोजित विश्व आर्थिक मञ्चको ५६औँ वार्षिक बैठकलाई सम्बोधन गर्दै ट्रम्पले रुस–युक्रेन द्वन्द्व, नेटो र यस युद्धमा वासिंटनको भूमिकाबारे विस्तृत चर्चा गरे । युक्रेनी राष्ट्रपति भोलोदिमिर जेलेन्स्की र रुसी राष्ट्रपछि भ्दालिमिर पुटिनबीचको तीव्र घृणाका बाबजुद पनि द्वन्द्वको समाधान सम्भव रहेको उनको भनाइ थियो ।
अमेरिकी राष्ट्रपतिले भने, “मैले आठभन्दा बढी युद्धहरू सुल्झाएको छु । मेरा लागि सजिलो युद्धहरूमध्ये यो एक हुनेछ । कतिपय युद्ध त मैले घण्टामै सुल्झाएको छु, किनकि म यस्ता काममा माहिर छु । वास्तवमा यो काम संयुक्त राष्ट्र संघले गर्नुपर्ने हो । तर, यसले केही फरक पर्दैन । हामी लाखौँ मानिसको ज्यान बचाइरहेका छौँ ।”
उनले युक्रेन–रुसको मामिलामा जेलेन्स्की र पुटिनबीच धेरै वैमनस्यता रहेको बताएका छन् । “यो मेलमिलापका लागि राम्रो होइन, यो असामान्य घृणा हो । तैपनि मलाई लाग्छ रूस सम्झौता गर्न चाहन्छ,” ट्रम्पले भने, “मलाई लाग्छ युक्रेन पनि सम्झौता गर्न चाहन्छ । हामी सम्झौता गराउने कोसिस गर्नेछौँ । हामी सफलताको निकै नजिक छौँ ।”
ट्रम्पले युक्रेन युद्धमा वासिंगटनको भूमिकालाई कम महत्व दिँदै यो द्वन्द्व मुख्य रूपमा युरोपको जिम्मेवारी भएको तर्क गरे । उनले नेटोले अमेरिकासँग निकै अन्यायपूर्ण व्यवहार गरिरहेको बताए ।
गठबन्धनबारे चर्चा गर्दै उनले यदि आफू त्यस समयमा राष्ट्रपति भएको भए यो युद्ध नै नहुने दाबी दोहोर्याए । उनले २०२० को अमेरिकी चुनाव ‘धाँधलीपूर्ण’ भएको आफ्नो पुरानो दाबीलाई पनि फेरि उठाए ।
“मृत्यु, विनाश र हाम्रा प्रयासको कदर नगर्ने मानिसहरूलाई ठूलो मात्रामा नगद दिनुबाहेक हाम्रो देशले के पायो ? म नेटो र युरोपको कुरा गर्दै छु,” युद्ध अन्त्य गर्ने प्रयासबाट अमेरिकाले के पायो भन्ने प्रश्न उठाउँदै ट्रम्पले भने, “उनीहरूले युक्रेनको विषयमा काम गर्नुपर्छ, हामीले होइन । अमेरिका धेरै टाढा छ, हाम्रो बीचमा एक विशाल र सुन्दर महासागर छ । यससँग हाम्रो कुनै लेनादेना छैन ।”
ट्रम्पले युद्ध अन्त्य गर्न युक्रेनका राष्ट्रपतिसँग कुराकानी गरिरहेको र उनीसँग भेट्ने योजना रहेको बताए ।
सञ्चार माध्यमका अनुसार, ट्रम्पले जेलेन्स्कीलाई भेट्ने योजना बनाएको सोही दिन उनका विदेश दूत स्टिभ विटकफ र उनका ज्वाइँ जेरेड कुस्नर रूसी राष्ट्रपति भ्लादिमिर पुटिनसँगको भेटका लागि मस्को प्रस्थान गर्नेछन् ।
जेलेन्स्की र पुटिनका बारेमा ट्रम्पले भने, “उनीहरू यस्तो मोडमा आइपुगेका छन्, जहाँ उनीहरू सँगै बसेर सम्झौता गर्न सक्छन् । यदि, त्यसो गरेनन् भने उनीहरू मूर्ख हुन् ।” एजेन्सी
