रमा-कृष्ण सृजना प्रतिष्ठानद्वारा विविध विधाका छजना साधकहरू सम्मानित
काठमाडौँ —रमा-कृष्ण सृजना प्रतिष्ठानले साहित्य, सङ्गीत र विज्ञान क्षेत्रका विशिष्ट प्रतिभाहरूलाई सम्मानित र पुरस्कृत गरेको छ । कार्यक्रममा प्रमुख अतिथि प्रा.डा. वासुदेव त्रिपाठीले क्रमशः २०८० र २०८१ सालका लागि कवि भवानी घिमिरेस्मृति रमा-कृष्ण साहित्य सम्मानबाट साहित्यकार तथा समालोचक प्रा.डा. चूडामणि बन्धु र प्रा.डा. अभि सुवेदीलाई सम्मानित गर्नुभयो ।
यसैगरी डा. त्रिपाठीले वीर झागल गुरुङस्मृति रमा-कृष्ण जनजाति उन्नयन पुरस्कारबाट सङ्गीतसाधक बुलु मुकारुङ र राजकुमार श्रेष्ठलाई पुरस्कृत गर्नुभयो भने
डा. हर्क गुरुङस्मृति रमा-कृष्ण विज्ञान/प्रविधि पुरस्कारबाट वैज्ञानिक, अन्वेषक डा. मनीषराज पाण्डे र डा. इन्द्रप्रसाद सुवेदीलाई पुरस्कृत गर्नुभयो ।
सो अवसरमा प्रमुख अतिथि डा. त्रिपाठीले रमा-कृष्ण सृजना प्रतिष्ठानले विगत १५ वर्षदेखि निरन्तररूपमा साहित्य, कला र विज्ञान क्षेत्रका साधक, अन्वेषकहरूलाई यसरी नै सम्मानित पुरस्कृत गर्दै आउनु प्रशंसनीय रहेको बताउनुभयो । उहाँले भवानी घिमिरे, वीर झागल गुरुङ र डा. हर्क गुरुङका योगदानलाई पनि स्मरण गर्नुभयो ।
यी सम्मान र पुरस्कारमा क्रमशः पन्ध्र हजार र दश दश हजार रुपैयाँसहित दोसल्ला र सम्मानपत्र रहेका छन् ।
प्रा.डा. चूडामणि बन्धुले आफू पछिल्लो समयमा नेपाली बालसाहित्यका क्षेत्रमा क्रियाशील रहेको जानकारी गराउँदै प्रतिष्ठानले साहित्य, सङ्गीत र विज्ञान क्षेत्रमा योगदान गरेका स्रष्टा साधकहरूलाई खोजेर सम्मानित पुरस्कृत गर्नु उल्लेखनीय रहेको बताउनुभयो ।
प्रा.डा. अभि सुवेदीले प्रतिष्ठानले सम्मानित गरेकामा खुसी व्यक्त गर्दै बाबुआमाका नाउँमा संस्था स्थापित गर्नु र भवानी घिमिरे, झागल गुरुङ र डा. हर्क गुरुङजस्ता अग्रजको स्मृतिमा सम्मान, पुरस्कार स्थापना गर्नु प्रशंसायोग्य छ भन्नुभयो ।
बुलु मुकारुङले गीतसङ्गीतका क्षेत्रमा आफूले गरेको कार्यको स्मरण गर्दै पुरस्कृत भएकामा खुसी व्यक्त गर्नुभयो ।
राजकुमार श्रेष्ठले आफूले यहाँसम्म आइपुग्न गरेको सङ्घर्षका बारेमा जानकारी गराउँदै सङ्गीतसम्राट् अम्बर गुरुङको सान्निध्यले आफू नेपाली अर्केष्ट्रा सङ्गीतमा लागेको बताउनुभयो ।
डा. मनीषराज पाण्डेले आफू पनि पुरस्कृत भएकामा खुसी व्यक्त गर्दै प्रकृति तथा वातावरण संरक्षणका क्षेत्रमा आफू अझ क्रियाशील रहन प्राप्त पुरस्कारबाट प्रेरित रहेको बताउनुभयो
कार्यक्रममा लक्ष्मी उप्रेतीको कवितासङ्ग्रह ‘तरङ्गित धुन’ को अङ्ग्रेजी अनुवाद ‘Ripples of Emotions’ को विमोचन गरिएको थियो । विमोचित कृतिका बारेमा समालोचक डा. बलराम अधिकारीले समीक्षात्मक मन्तव्य व्यक्त गर्नुभएको थियो ।
प्रतिष्ठानका अध्यक्ष तथा कार्यक्रमका सभापति इ. महेन्द्रबहादुर गुरुङले सम्मान र पुरस्कार ग्रहण गरिदिएकामा खुसी र कृतज्ञता व्यक्त गर्दै अग्रज स्रष्टाहरूका तीनवटा कविता वाचन गर्नुभएको थियो ।
प्रतिष्ठानका महासचिव तथा कार्यक्रमका सहजकर्ता यादव भट्टराईले नेपाली समाजका विशिष्ट साधक अन्वेषकहरूले सम्मान पुरस्कार ग्रहण गरिदिनुभएर रमा-कृष्ण सृजना प्रतिष्ठान स्वयम् सम्मानित भएको बताउनुभयो ।
प्रतिष्ठानका सचिव सीताराम गुरुङले स्वागत मन्तव्य र उपाध्यक्ष लक्ष्मी उप्रेतीले धन्यवाद ज्ञापन गर्नुभएको सो समारोहको अन्त्यमा अन्नपूर्ण च्याम्बर अर्केष्ट्रा समूहले राजकुमार श्रेष्ठको निर्देशन र सुधाकर वस्तीको सहसंयोजनमा वृन्दवादन प्रस्तुत गरेको थियो ।
Comments are closed.