काठमाडौं – राष्ट्रिय प्रजातन्त्र पार्टी-राप्रपाले राजा, राजनीतिक दल र जेन-जी लगायत सरोकारवालाको सर्वपक्षीय बैठक आह्वान गर्न अन्तरिम सरकारका प्रधानमन्त्री सुशीला कार्कीलाई दबाब दिएको छ ।
शनिवार बालुबाटारमा प्रधानमन्त्री कार्कीलाई भेटेर राप्रपाले राजा, राजनीतिक दल र जेन-जी लगायत सरोकारवालाको सर्वपक्षीय बैठक आह्वान गर्न दबाब दिएको हो । अन्तरिम सरकार २०८४ मा हुने निर्वाचन २०८२ मा गराउन मात्रै नबनेको स्पष्ट पारेको पार्टी अध्यक्ष राजेन्द्रप्रसाद लिङदेनले बताउनु भयो ।
निर्वाचन नै समस्याको समाधान नभएको उहाँको भनाइ छ । अन्तरिम सरकारले देशलाई दीर्घकालीन निकास दिनुपर्ने उहाँले बताउनु भयो । राप्रपाले आगामी निर्वाचनमा विदेशमा बस्ने नेपालीहरूले मदतदान गर्न पाउने व्यवस्था गर्न पनि माग गरेको छ । अध्यक्ष लिङदेनले जेन-जी आन्दोलनका प्रमुख पक्ष शहीद परिवार र घाइतेहरू भएकाले उनीहरूको मागलाई सम्बोधन गर्न पनि आग्रह गर्नुभयाे ।
जेन-जी प्रदर्शनमा सहभागी भएकै आधारमा मानिसहरू पक्रिने र दुःख दिने काम भएको उहाँकाे भनाइ थियाे । जेन-जीका प्रमुख व्यक्तिहरूलाई नै सिंहदरबार प्रवेश गर्न नदिने, लछारपछार गर्ने काम भइरहेको भन्दै यस्तो काम बन्द गर्न आग्रह गरेको उहाँले जानकारी दिनुभयो । अध्यक्ष लिङदेनले सरकारका बारेमा राप्रपाले मंसिर २३ गते काठमाडौंमा ध्यानाकर्षण सभा गर्ने र देशभर यस प्रकारका सभाहरू आयोजना गर्ने जानकारी प्रधानमन्त्री कार्कीलाई गराएको बताउनु भयो ।
राजासहितको सर्वपक्षीय छलफलबारे प्रधानमन्त्री कार्कीले यसबारेमा अहिले केही नसोचेको र आफ्नो क्षेत्र नभएको बताउनुभएको अध्यक्ष लिङदेनले जानकारी दिनुभयो ।
