राप्रपाद्वारा सरकारसँग पाँच बुँदे माग

काठमाडौं । राष्ट्रिय प्रजातन्त्र पार्टी (राप्रपा)ले सरकार समक्ष पाँच बुँदे मागसहित ध्यानाकर्षण पत्र पेस गरेको छ ।

अध्यक्ष राजेन्द्र लिङ्देनसहित नेताहरूले कार्यवाहक प्रधानमन्त्री प्रकाशमान सिंहलाई भेटेर गृह मन्त्रीको राजीनामा सहित पाँच बुँदे मागसहित ध्यानाकर्षण पत्र बुझाउनुभएको हो । राप्रपाले सो पार्टीका नेता रवीन्द्र मिश्र, धवल शमशेर राणा लगायतलाई राज्यविरुद्धको अपराध जस्तो गम्भीर प्रकृतिको मुद्दा चलाएकोमा आपत्ति जनाएको छ । राजावादीले चैत १५ गते काठमाडौंमा गरेको प्रदर्शनका क्रममा घाइते भएकाहरूको निःशुल्क र प्रभावकारी उपचारको व्यवस्था गर्नुपर्ने माग पनि सो पार्टीले गरेको छ ।

सो घटनाको राप्रपाले सर्वोच्च अदालतको पूर्वन्यायाधीशको अध्यक्षतामा मानव अधिकार आयोग, नागरिक समाज सम्मिलित स्वतन्त्र छानबिन आयोगको गठन गर्न माग गरेको छ छ ।

चैत १५ गते दुर्गा प्रसाईँको आह्वानमा राजसंस्था पुनर्स्थापनाका लागि तीनकुनेमा प्रदर्शन भएको थियो । जसमा राप्रपाको पनि समर्थन र सहभागिता थियो । त्यस क्रममा तोडफोड, आगजनी, लुटपाट भएको थियो भने दुई जनाको ज्यान गएको छ ।

ध्यानाकर्षण पत्र बुझाएपछि सञ्चारकर्मीसँगको कुराकानीमा अध्यक्ष लिङ्देनले चैत्र १५ गतेको हिंसात्मक घटनालाई राज्यले एकपक्षीय रूपमा प्रचार गर्ने र राज्यको ज्यादतीलाई ढाकछोप गर्ने क्रियाकलाप बढाएको आरोप लगाउनुभयो । ‘सरकारको तर्फबाट मञ्चमा प्रहार गरिएको अश्रुग्याँस पनि फेक हो भनेर प्रचार गरियो, यसमा हाम्रो गम्भीर ध्यानाकर्षण भएको छ, घटनालाई हिंसात्मक बनाउन सरकार स्वयम लागि परेको छ’, उहाँले भन्नुभयो ।