काठमाडौं- व्यापारी दिपक भट्टसँग ४५ करोड अवैध कारोबारमा मुछिएका शंकर ग्रुपका अध्यक्ष शंकर अग्रवाल पक्राउ परेका छन् । अग्रवालसँग सम्पत्ति शुद्धीकरण विभागले दिउँसो ४ बजेबाट बयान लिएको स्रोत बताउँछ ।
सोही क्रममा बयान नसकिएपछि उनलाई ललितपुर प्रहरीको हिरासतमा पठाइएको हो ।
शंकर ग्रुप र दीपक भट्टका कम्पनीबीच सन्देहपूर्ण कारोबार पुष्टि भएको थियो । जसमा विभागले सबै प्रमाण संकलन गरिसकेको छ ।दिपक भट्टकी सासू अञ्जना नेपालको नाममा दर्ता गरिएको एलियन्ट ब्रोकरेज कम्पनीमा हिमालयन रिइन्स्योरेन्सबाट ५२ करोड रुपैयाँ जम्मा गरिएको विषयमा छानबिन भएको थियो ।नेपाल राष्ट्र बैंकको वित्तीय जानकारी इकाइले भट्ट र उनको परिवारको बैंक खातामा अस्वाभाविक कारोबार पत्ता लगाएपछि दुई वर्षअघि नै पत्राचार गरेको थियो ।
भट्टको एकल स्वामित्वमा रहेको कम्पनी इन्फिनिटी होल्डिङ प्रालिको चुक्ता पुँजी एक वर्षमा तीन करोडबाट रहस्यमय रुपमा ४८ करोड पुर्याइएको थियो । जसको स्रोत खुलेको छैन ।
२०७७ असारमा सो कम्पनीको चुक्ता पुँजी तीन करोड रहेकोमा २०७८ असार मसान्तमा ४८ करोड पुगेको थियो ।
भट्टको व्यक्तिगत खातामा शंकर ग्रुपको जगदम्बा स्टिल्सको खाताबाट ४५ करोड जम्मा भएको थियो । कम्पनीको खाताबाट सो रकम भट्टको सिद्धार्थ बैंकमा रहेको व्यक्तिगत खातामा गएको थियो ।
जुन कारोबारको प्रयोजन र वास्तविक धनीको पहिचान नखुलेको राष्ट्र बैंकको छानविनका क्रममा भेटिएको थियो । हिमालयन रिइन्स्योरेन्स लिमिटेड र इन्फिनिटी होल्डिङ प्रालिबिचको करोडौँको कारोबार पनि खुलेको छैन । जगदम्बा र हिमालयन रिइन्स्योरेन्ससँग कारोबार पनि कानूनविपरीत देखिएको छ ।
हिमालयन रिइन्स्योरेन्स भट्टकै अग्रसरतामा खोलिएको कम्पनी हो । जसमा सबैभन्दा ठूलो नीतिगत भ्रष्टाचारको आरोप लाग्दै आएको छ । जून शंकर ग्रुपकै अग्रसरतामा खोलिएको कम्पनी हो ।
जगदम्बा स्टिल्सको खाताबाट उनले आर्थिक वर्ष ०७७/७८ मा ४८ करोड लिएकोमा पछि गायब बनाइएको थियो ।
भट्टको एकल स्वामित्वमा रहेको इन्फिनिटी होल्डिङ्स प्रालि र उनको व्यक्तिगत ओफरड्राफ्ट चल्ती खाताबाट शंकास्पद र अस्वाभाविक कारोबार कानूनविपरीत भएको छानबिनबाट पुष्टि भएको छ ।
५० लाख ऋणको सीमा रहेको उनको व्यक्तिगत खाताबाट १४ असार ०७८ देखि २३ असारको बिचमा ३० करोड १५ लाख ८७ हजार ७४७ रुपैयाँ जम्मा भएको थियो भने ४५ करोड चार लाख ४५ हजार ११० रुपैयाँ भुक्तानी भएको थियो ।
त्यस्तै, १७ असार ०७८ देखि ५ साउन ०७८ को बिचमा इन्फिनिटी होल्डिङको खातामा १८ करोड ४० लाख ९५ हजार ५६६ रुपैयाँ जम्मा र ६३ करोड ४० लाख ९३ लाख ८२९ रुपैयाँ भुक्तानी भएको समेत विभागको छानबिनबाट खुलेको छ ।
जुन खाताको ऋण सीमा ४४ करोड रुपैयाँ छ । त्यस्तै, उनको नेपाल इन्भेस्टमेन्ट बैंकको खातामा सोही वर्ष असार १३ देखि १६ गतेबिचमा जगदम्बा स्टिल्सबाट ४५ करोड जम्मा भएको थियो ।
