काठमाडौं — बंगलादेशकी पूर्वप्रधानमन्त्री शेख हसिना दुई वर्षपछि पहिलोपटक सार्वजनिक कार्यक्रममा सहभागी हुने भएकी छन्। विद्यार्थी आन्दोलनपछि देश छाडेर भारत पुगेकी हसिनाले आगामी बुधबार (५ अगस्ट) नयाँ दिल्लीबाट पत्रकार सम्मेलन गर्ने तयारी गरेकी हुन्।
नयाँ दिल्लीस्थित फरेन करोसपन्डेन्ट्स क्लब अफ साउथ एसियाले आयोजना गर्ने पत्रकार सम्मेलनमा हसिना भर्चुअल माध्यमबाट सहभागी हुने बताइएको छ। सम्मेलनमा उनले बंगलादेश फर्कने आफ्नो योजनाबारे पत्रकारहरूसँग धारणा राख्ने अपेक्षा गरिएको छ।
५ अगस्ट २०२४ मा भएको विद्यार्थी आन्दोलनपछि प्रधानमन्त्री पदबाट राजीनामा दिएर हेलिकोप्टरमार्फत भारत पुगेकी हसिना त्यसयता सार्वजनिक रूपमा देखिएकी थिइनन्।
देश छाडेको ठीक दुई वर्षपछि उनी पहिलोपटक सार्वजनिक रूपमा देखिन लागेकी हुन्। उनको सम्भावित स्वदेश फिर्ती र त्यससँग सम्बन्धित राजनीतिक योजनाप्रति बंगलादेश तथा अन्तर्राष्ट्रिय समुदायको चासो बढेको छ।
