मातृभूमि साहित्य समाज मकवानपुरले प्रदान गर्दै आएको महालक्ष्मी साहित्य पुरस्कार प्रख्यात कवि तथा गीतकार श्रवण मुकारूङलाई प्रदान गरिएको छ ।
मातृभूमि साहित्य समाजले महालक्ष्मी बैंकसँग सहकार्य गर्दै यो पुरस्कार दिने गरिएको छ । पुरस्कारको राशि ५१ हजार रूपैयाँ रहेको छ ।
यस्तै मातृभूमिको संयोजन एवम् व्यवस्थापनमा ईश्वर मैनालीले आफ्ना बुवाको केशवलालको स्मृतिमा स्थापना गर्नु भएको मातृभूमि पत्रकारिता पुरस्कार मकवानपुरका अग्रज पत्रकार केशव दाहाललाई प्रदान गरिएको छ । पुरस्कारको राशी नगद ७ हजार ५ सय रुपैयाँ रहेको छ ।
कार्यक्रमका प्रमुख अतिथि वरिष्ठ साहित्यकार केशवराज आमोदी, आयोजक संस्थाका अध्यक्ष माधव पोख्रेल, हाम्रो मझेरी साहित्यिक प्रतिष्ठानका अध्यक्ष पुष्प अधिकारी ‘अन्जली’ लगायतले मुकारुङ र दाहाललाई नगदसहित सम्मानपत्र प्रदान गर्दै दोसल्ला ओढाउनु भएको थियो ।
पुरस्कृत प्रसिद्ध साहित्यकार तथा गीतकार मुकारुङले सम्मानले लेखन कार्यलाई थप मद्दत पुग्ने धारणा राख्नु भयो ।
‘लेखकले प्राप्त गर्ने पुरस्कार भनेकै सम्मान हो’, मुकारूङले भन्नुभयो, ‘सम्मानको निम्ति आभार व्यक्त गर्न चाहन्छु ।’ साहित्यकार तथा कलाकार सबैको साझा हुने भन्दै उहाँले स्थानीय र राष्ट्रिय भन्नै नहुने धारणा राख्नुभयो ।
कार्यक्रममा समाजका कार्यसमिति सदस्य साहित्यकार किसन पौडेलले लेखेको लघुकथा ‘खुसी’को गृह विमोचन समेत गरिएको थियो । कार्यक्रमका प्रमुख अतिथि वरिष्ठ साहित्यकार केशवराज आमोदीले साहित्य क्षेत्र अझै राज्यको नजरमा पर्न नसकेको धारणा राख्नुभयो । भाषा साहित्य, कला र संस्कृतिको संरक्षण गर्ने उद्देश्यसहित २०५६ सालमा स्थापना भएको मातृभूमि साहित्य समाजले साहित्यिक गतिविधिसँगै विभिन्न सम्मान तथा पुरस्कारको व्यवस्थापन र प्रदान समेत गर्दै आएको छ ।
