काठमाडौँ- “तिमी पुग्यौ धेरै टाढा हिँड्नेलाई बाटो रहेछ छोडी गयौ सबै आफ्ना बस्नेलाई माटो रहेछ”
यी हरफहरू भर्खरै सार्वजनिक भएको म्युजिक भिडियो “ति मी पुग्यौ धेरै टाढा” गीतका स्थायी लाइन हुन्। कवि, नाटककार तथा गीतकार गणेश खड्का प्रवासमा बसेर कलम चलाउँछन्।
प्रवासमै बस्ने अर्का सङ्गीतकार तथा गायक नवीन खनालले शब्द मन पराएपछि सहकार्य गर्ने सल्लाह त भयो तर रेकर्डिङको प्रक्रिया थाल्नै वर्षौँ लाग्यो। प्रवासी जीवन बाध्यता, आवश्यकता र परिस्थितिको दास हुँदै हो। समय अर्काको अधीनमा हुन्छ अनि जिन्दगी पनि अरूकै बन्दकीमा। पराधीन जीवनशैली र बन्दकी समयका चोक्राहरू निचोरेर आफूलाई थोरै भए पनि सिर्जनशील बनाउनु आत्मसन्तुष्टिको शर्तमा गति लैजानु पर्ने कुरा रहेछ। लेखेर छोडेको गीतप्रति अन्याय नहोस् भन्ने हेतुले अन्ततः गीत रेकर्ड भयो।
पुरुष आवाज सङ्गीतकार नवीन आफैँले दिने भए। महिला आवाजमा गायिका रजिना रिमालले साथ दिएकी छिन्। गीत त रेकर्ड भयो, तर सुन्ने होइन हेर्ने जमाना मा अडियोले मात्रै गीतको पूर्णता महसुस गराउने कुरो थिएन।
सन्तोषजनक सुनिएको गीतको अडियोले अन्ततः भिडियो पनि निर्माण गर्ने आकांक्षा बढायो। सबैको मन मिल्यो। टिम बन्यो र एउटा प्रेमिल सांगीतिक कर्मले पूर्णता पायो। गीतकार सेसेल्स, सङ्गीतकार दुबई अनि गायिका लगायत म्युजिक भिडियोमा सामेल अन्य टिम सदस्य नेपालमा छन्। कुनै समयका रेडियो सहकर्मी गणेश खड्का र नवीन खनालले आफूहरू पचासको दशकमा रेडियो नेपालमा हुँदै केही गीतमा सहकार्य गरिसकेका थिए।
नाटक, कविता, गीत, गजल, मुक्तक, कथा, निबन्ध तथा समसामयिक लेख रचनामा कलम चलाउँदै आएका साहित्यकार गणेश खड्काका यसअघि पनि दर्जन बढी गीतहरू बजारमा आइसकेका छन्। साथै उनका नाटकसङ्ग्रह र कविता सङ्ग्रह सहित अन्य केही सम्पादित पुस्तकहरू पनि प्रकाशित छन्। लेखक तथा सम्पादकमा छवि बनाएका खड्का अन्तर्राष्ट्रिय नेपाली साहित्य समाज (अनेसास) का केन्द्रीय उपाध्यक्ष पनि हुन्। अन्तरजातीय प्रेम सम्बन्धको सङ्घर्षपूर्ण कथा भन्दै अन्ततः आपसी समर्पण र सङ्कल्पले प्रेमसँगै जीवन पनि सफल हुन्छ भन्ने वस्तुनिष्ठ सत्य तथा सामाजिक सन्देश दिएर गीत क्लाइमेक्समा सुखान्त भएर सकिन्छ।
प्रस्तुत गीतको म्युजिक भिडियोमा दृश्य सुवेदी र रुषा नेउपानेले जीवन्त अभिनय गरेका छन्। गीतमा रिकेश गुरु गुङ्गको सङ्गीत संयोजन, हरि हुमागाईंको छायाङ्कन अनि शिवपुरीको निर्देशन तथा सम्पादन रहेको छ। यतिबेला प्रस्तुत गीतलाई दर्शक (श्रोताले) राम्रो प्रतिक्रिया सहित मन पराइरहेका छन्।
गीतकारको आफ्नै युट्युब च्यानल न्बलभकज प्जबमपब मार्फत २६ मङ्सिर २०८२ तदनुसार १२ डिसेम्बर २०२५ का दिन सार्वजनिक भएको गीतको समग्रता बुझ्न भने गीत पुरै सुन्नु र हेर्नु पर्ने हुन्छ।
