कथादिवस सम्पन्न, रत्न कोजुलाई मैनाली कथा सम्मान र डा. राजेन्द्र विमललाई भानु तुलसी सम्मान

काठमाडौं– साहित्यिक पत्रकार संघले ४४ औं कथा दिवसको अवसरमा आज डालो रेस्टुरेन्ट, अनामनगरमा “मैनाली कथा सम्मान-२०८१” समर्पण गर्नुका साथै लघुकथा वाचन कार्यक्रमको आयोजना गर्‍यो । संघका अध्यक्ष राधेश्याम लेकालीको अध्यक्षतामा भएको सो कार्यक्रममा प्रमुख अतिथि वरिष्ठ कथाकार डा. राजेन्द्र विमलले ३० को दशकका सशक्त कथाकार रत्न कोजुलाई सो सम्मान प्रदान गर्नुभएको थियो ।

सोही अवसरमा अध्यक्ष राधेश्याम लेकालीले कथाकार डा. राजेन्द्र विमललाई “भानु-तुलसीदास सम्मान” अर्पण गर्नुभएको थियो । उहाँलाई २०७९ वैशाख १६ गते काठमाडौंमा आयोजित नेपाल-भारत साहित्य महोत्सवमा सो सम्मान घोषणा गरिएको थियो । त्यसबेला उहाँ कार्यक्रममा उपस्थित हुन सक्नुभएको थिएन ।

कार्यक्रममा प्रमुख अतिथि डा. विमलले सङ्कटको अवस्थामा रहेको देशलाई त्यसबाट मुक्त गर्ने अभिभारा नयाँ पुस्ताका सर्जकहरूमा भएको बताउनुभयो । कथाकार ध्रुव मधिकर्मीले कथाकार कोजूको योगदानको चर्चासँगै उनीसँगका सहकार्यबारे उल्लेख गर्नुभयो । चयन समितिका संयोजक वरिष्ठ समालोचक प्रमोद प्रधानले कोजूका कथाहरूमा उनी जन्मेको ठाउँका मानिसका दुखपीडा, संस्कृति र जीवनशैली उद्घाटित हुने बताउनुभयो ।

कार्यक्रममा साहित्यकार श्रीओम श्रेष्ठ “रोदन”ले राजेन्द्र विमलको शालीनता र विद्वताको चर्चा गर्नुभयो । कार्यक्रममा संघका पूर्व अध्यक्ष नरेन्द्रबहादुर श्रेष्ठ र कोषाध्यक्ष पद्मावती सिंहले बोल्नुका साथै कार्यसमिति सदस्य डा. दामोदर पुडासैनीले सहजीकरण गर्नुभएको थियो । सो अवसरमा कथाकारहरू लता के. सी., शान्ता तिम्सिना, इन्दिरा चापागाईँ, सत्या अधिकारी, अन्जु थपलिया, मिसु श्रेष्ठ, मन्दिरा मधुश्री र ललिता दोषीले आआफ्ना लघुकथा वाचन गर्नुभएको थियो ।