काठमाडौं – गृहमन्त्री सुधन गुरुङ ले चितवनको कुरिनटारस्थित सशस्त्र प्रहरी बल विपद् व्यवस्थापन तालिम शिक्षालयको निरीक्षण गरेका छन्।
शनिबार आयोजित उक्त निरीक्षणका क्रममा गृहमन्त्री गुरुङले तालिम शिक्षालयको भौतिक पूर्वाधार, जनशक्ति व्यवस्थापन, उपकरणको अवस्था तथा विपद् व्यवस्थापनका लागि तयारीको अवस्थाबारे विस्तृत जानकारी लिएका थिए। उनले त्यहाँ कार्यरत सशस्त्र प्रहरी अधिकारीहरूबाट वर्तमान चुनौती, स्रोतसाधनको अभाव तथा सुधार गर्नुपर्ने पक्षबारे ब्रिफिङ समेत लिएका थिए।
निरीक्षणका क्रममा गृहमन्त्री गुरुङले विपद् व्यवस्थापनलाई अझ प्रभावकारी बनाउन आवश्यक पूर्वतयारीमा जोड दिएका छन्। उनले प्राकृतिक विपद् जस्तै बाढी, पहिरो, भूकम्प लगायतका घटनामा छिटो उद्धार तथा राहत कार्य सञ्चालन गर्न पूर्वाधार विस्तार अपरिहार्य रहेको उल्लेख गरे। सोही सन्दर्भमा उनले कम्तीमा पाँच किलोमिटरको दूरीमा हेलिप्याड स्टेसन स्थापना गर्न निर्देशन दिएका छन्। यस्तो व्यवस्था भएमा आकस्मिक अवस्थामा उद्धार टोली र आवश्यक सामग्री छिटो परिचालन गर्न सहज हुने उनको भनाइ थियो।
गुरुङले विपद्का समयमा ‘गोल्डेन आवर’ अत्यन्त महत्वपूर्ण हुने उल्लेख गर्दै त्यस अवधिमा प्रभावकारी रूपमा काम गर्न सक्ने गरी पूर्वतयारी गर्न निर्देशन दिए। उनले आधुनिक प्रविधिको प्रयोग, तालिमको स्तर अभिवृद्धि तथा स्थानीय तहसँग समन्वयलाई थप सुदृढ बनाउन पनि जोड दिए।
निरीक्षण कार्यक्रममा सशस्त्र प्रहरी बलका वरिष्ठ अधिकारीहरूको उल्लेख्य उपस्थिति रहेको थियो। कार्यक्रममा चितवनका प्रमुख जिल्ला अधिकारी गणेश अर्याल, सशस्त्र प्रहरीका एसएसपी भरत खनिया, सशस्त्र प्रहरी नायब महानिरीक्षक अन्जनि कुमार पोख्रेल, जिल्ला प्रहरी कार्यालय चितवनका प्रमुख प्रहरी उपरीक्षक गोबिन्द पुरी तथा ट्राफिक प्रहरी उपरीक्षक दिल्ली नारायण पाण्डे लगायतको सहभागिता रहेको थियो।
उक्त अवसरमा अधिकारीहरूले विपद् व्यवस्थापनका लागि आवश्यक स्रोतसाधन, जनशक्ति तथा तालिममा देखिएका समस्याहरू गृहमन्त्रीसमक्ष प्रस्तुत गरेका थिए। उनीहरूले विशेषगरी दुर्गम क्षेत्रहरूमा उद्धार कार्य सञ्चालन गर्दा सामना गर्नुपर्ने चुनौती, उपकरणको सीमितता तथा पूर्वाधारको अभावबारे ध्यानाकर्षण गराएका थिए।
गृहमन्त्री गुरुङले प्रस्तुत समस्याहरू समाधानका लागि आवश्यक पहल गरिने प्रतिबद्धता व्यक्त गरेका छन्। उनले सरकार विपद् व्यवस्थापनलाई प्राथमिकतामा राखेर काम गरिरहेको उल्लेख गर्दै सशस्त्र प्रहरी बललाई थप सुदृढ बनाउने दिशामा नीति तथा कार्यक्रम अगाडि बढाइने बताएका छन्।
यस निरीक्षणले विपद् व्यवस्थापन संरचनालाई अझ व्यवस्थित, द्रुत र प्रभावकारी बनाउने दिशामा महत्वपूर्ण सन्देश दिएको छ। साथै, केन्द्र र स्थानीय तहबीचको सहकार्यलाई मजबुत बनाउँदै विपद्का जोखिम न्यूनीकरणमा दीर्घकालीन रणनीति आवश्यक रहेकोमा समेत जोड दिइएको छ।
