काठमाडौं – सूर्य नेपाल गल्फ टुर २०२५/२६ अन्तर्गतको तेस्रो प्रतियोगिता सूर्य नेपाल एनपीजीए टुर च्याम्पियनसिप मिथिला नगरीस्थित आर्मी गल्फ क्लबमा भएको छ ।
प्रतियोगिताको कुल पुरस्कार राशि १० लाख ५० हजार रुपैयाँ रहेको छ । विजेताले एक लाख ७० हजार रुपैयाँ प्राप्त गर्नेछन् । दोस्रो र तेस्रो स्थान प्राप्त गर्ने खेलाडीले क्रमशः एक लाख २५ हजार र एक लाख रुपैयाँ हात पार्नेछन् । शीर्ष १८ स्थानभित्र पर्ने खेलाडी पुरस्कारको हकदार बन्ने छन् ।
नेपाल नम्बर एक प्रो गल्फर तथा अघिल्लो प्रतियोगिता सूर्य नेपाल इस्टर्न ओपनका विजेता निरज तामाङ प्रमुख दाबेदारका रूपमा रहेका छन् । साथै, भुवन नगरकोटी, धन थापा, दिनेश प्रजापति र जयाराम श्रेष्ठ पनि उपाधि दाबेदारको सूचीमा छन् ।
तीनदिने प्रतियोगिता ५४ होलको हुनेछ । जहाँ ३१ प्रोफेसनल गल्फर र ह्यान्डिक्याप ५ वा सोभन्दा कम भएका ६ एमेच्योर गल्फरले उपाधिका लागि दाबेदारी प्रस्तुत गर्नेछन् । ३६ होलको सामाप्तिपछि कट लागु हुनेछ । शीर्ष १८ प्रोफेसनल र एमेच्योर खेलाडी फाइनल राउन्डमा प्रवेश गर्नेछन् ।
मधेस प्रदेशमा सूर्य नेपाल गल्फ टुरको कुनै पनि प्रतियोगिता हुन लागेको यो पहिलोपटक हो । नवनिर्मित यो गल्फ क्लबमा पहिलोपटक प्रो खेलाडीहरू प्रतिस्पर्धामा उत्रदैछन् । नयाँ गल्फ कोर्समा खेल्ने चुनौती खेलाडीहरूलाई रहनेछ ।
