काठमाडौं — समाज कल्याण परिषद्ले भृकुटीमण्डपस्थित ‘काठमाडौँ उपत्यका सार्वजनिक पुस्तकालय’मा लगाएको ताला खोलेको छ। परिषद् र पुस्तकालय व्यवस्थापन पक्षबीच पुस्तकालय पुनः सञ्चालन गर्ने सहमति भएपछि बुधबार औपचारिक रूपमा ताला खोलिएको हो।
परिषद्ले भाडा बापतको बक्यौता रकम भुक्तानी नभएको भन्दै गत चैत ३ गते पुस्तकालयमा तालाबन्दी गरेको थियो। पुस्तकालय लामो समय बन्द हुँदा अध्ययनका लागि नियमित आउने विद्यार्थी, अनुसन्धानकर्ता तथा सर्वसाधारण पाठक प्रभावित भएका थिए।
मंगलबार दुवै पक्षबीच बक्यौता रकम व्यवस्थापन तथा पुस्तकालय सञ्चालनलाई निरन्तरता दिने विषयमा सहमति भएपछि पुस्तकालय पुनः सञ्चालनमा आएको हो।
ताला खुलेसँगै पुस्तकालयका सेवा नियमित रूपमा सञ्चालन हुने भएका छन्। पुस्तकालय व्यवस्थापनले अब सर्वसाधारणलाई पूर्ववत् रूपमा अध्ययन तथा पठनपाठनका सुविधा उपलब्ध गराइने जनाएको छ। साथै, सहमतिअनुसार बक्यौता व्यवस्थापन गर्दै पुस्तकालयको नियमित सञ्चालनलाई निरन्तरता दिइने बताइएको छ।
