काठमाडौं – चीनको पूर्वी क्षेत्रमा शक्तिशाली ‘डल्फिन’ आँधी आएपछि १० लाखभन्दा बढी मानिसलाई सुरक्षित स्थानमा सारिएको छ। आँधीका कारण आर्थिक राजधानी साङ्घाईसहित पूर्वी चीनका विभिन्न क्षेत्रमा जनजीवन प्रभावित भएको छ।
मौसम अधिकारीहरूका अनुसार ‘डल्फिन’ आँधीले आइतबार साँझ करिब ५ः३० बजे झेजियाङ प्रान्तको युहुआनमा पहिलोपटक जमिनमा प्रवेश गरेको थियो। त्यसबेला आँधीको अधिकतम गति प्रतिघण्टा १५० किलोमिटरसम्म पुगेको थियो।
पहिलोपटक ल्यान्डफल गरेको करिब एक घण्टापछि आँधीले वेन्झोउ सहरमा दोस्रोपटक जमिन छोएको थियो। शक्तिशाली हावाहुरी र भारी वर्षाका कारण तटीय क्षेत्रका बासिन्दालाई सुरक्षित स्थानमा सारिएको चिनियाँ अधिकारीहरूले जनाएका छन्।
साङ्घाईमा १,४०० उडान रद्द
आँधीको प्रभावका कारण साङ्घाईमा मात्रै करिब १ हजार ४ सय उडान रद्द गरिएको छ। उडान रद्द भएपछि ठूलो संख्यामा यात्रु प्रभावित भएका छन् भने हवाई तथा सार्वजनिक यातायात सेवासमेत प्रभावित भएको छ।
आँधीको जोखिमलाई मध्यनजर गर्दै चिनियाँ अधिकारीहरूले सुरुमा सबैभन्दा उच्च तहको ‘रेड अलर्ट’ जारी गरेका थिए। तर सोमबार बिहान आँधीको तीव्रता केही कम भएपछि चेतावनीको तह घटाइएको छ।
बाढी र पहिरोको जोखिम
मौसम विभागका अनुसार ‘डल्फिन’ आँधी अहिले चीनको आन्तरिक भूभागतर्फ अघि बढिरहेको छ। आँधी कमजोर हुँदै गए पनि यसले ठूलो मात्रामा वर्षा गराउन सक्ने भएकाले बुधबारसम्म बाढी र पहिरोको जोखिम रहेको चेतावनी दिइएको छ।
सानडोङ, हेनान, हुबेई, अनहुई, जियाङ्सु र झेजियाङ प्रान्तका साथै साङ्घाई क्षेत्रमा सोमबार पनि भारी वर्षाको सम्भावना रहेको मौसम अधिकारीहरूले बताएका छन्।
स्थानीय प्रशासनले जोखिमयुक्त क्षेत्रमा रहेका नागरिकलाई सतर्क रहन तथा अत्यावश्यक कामबाहेक घरबाहिर ननिस्कन आग्रह गरेको छ।
आँधीका कारण प्रभावित क्षेत्रमा उद्धार तथा राहत टोलीलाई तयारी अवस्थामा राखिएको छ भने सम्भावित बाढी, पहिरो र यातायात अवरोधलाई ध्यानमा राख्दै स्थानीय प्रशासनले निगरानी बढाएको जनाएको छ।
