काठमाडौं – इरानका सर्वोच्च नेता अयातोल्लाह अली खामेनेईले मंगलबार अमेरिकी राष्ट्रपति डोनाल्ड ट्रम्पले इस्लामिक रिपब्लिकलाई ध्वस्त पार्न नसक्ने बताएका छन् । दुवै देशका वरिष्ठ अधिकारीहरूबीच मंगलबार जेनेभामा करिब तीन घण्टा कुराकानी भएपछि उनको यस्तो भनाइ आएको हो ।
उता, तेहरानमा दिएको एक भाषणमा खामेनेईले भने, “हालैको एक भाषणमा अमेरिकी राष्ट्रपतिले ४७ वर्षदेखि अमेरिकाले इस्लामिक रिपब्लिकलाई सिध्याउन सफल नभएको बताउनुभएको थियो । म भन्छु तपाईं पनि सफल हुनुहुने छैन ।”
खामेनेईको यो बयान यस्तो समयमा आएको छ, जब अमेरिका र इरानबीच जेनेभामा दोस्रो चरणको वार्ता भएको छ । पहिलो चरणको वार्ता फेब्रुअरी महिनाको सुरुमा भएको थियो । यसअघिको वार्ता गत वर्ष इरान र इजरायलबीच संघर्ष सुरु भएपछि रोकिएको थियो ।
भाषणका क्रममा खामेनेईले खाडीमा तैनाथ अमेरिकी विमानवाहक युद्धपोत डुब्न सक्ने चेतावनी दिए । खामेनेईले भने, “हामीले लगातार के सुनिरहेका छौँ भने उनीहरूले आफ्नो युद्धपोत इरानतर्फ पठाएका छन् । युद्धपोत निश्चित रूपमा खतरनाक हतियार हो, तर त्योभन्दा पनि खतरनाक हतियार त्यो हो जसले त्यसलाई डुबाउन सक्छ ।”
खामेनेईले अमेरिकासँग चलिरहेको वार्ताको नतिजाप्रति आशंका व्यक्त गरे । उनले भने, “के कुनै वार्ता हुन सक्छ ? किनकि वार्ताका लागि वास्तवमै कुनै ठाउँ बाँकी छैन । वार्ता हुनुअघि नै त्यसको नतिजा तय गरिदिनु गल्ती र पागलपन हो ।”
अमेरिकाले इरानसँग आफ्नो परमाणु कार्यक्रम बन्द गर्न माग गरिरहेको छ । गत वर्ष जुनमा १२ दिनसम्म चलेको इरान–इजरायल संघर्षका क्रममा अमेरिकाले इरानका प्रमुख परमाणु केन्द्रहरूलाई निसाना बनाएको थियो ।
