काठमाडौं – अमेरिकी सेनाको सेन्ट्रल कमान्ड (सेन्टकम) ले इरानको एउटा बन्दरगाहतर्फ अघि बढिरहेको पानामाको झन्डा बोकेको व्यापारिक जहाजलाई रोकेको दाबी गरेको छ।
सेन्टकमले सामाजिक सञ्जाल एक्समार्फत जारी गरेको आधिकारिक बयानमा उक्त जहाज ओमानको खाडी हुँदै इरानी बन्दरगाहतर्फ जाने प्रयास गरिरहेको जनाएको छ। अमेरिकी कमान्डका अनुसार जहाजको उद्देश्य अमेरिकी नौसैनिक नाकाबन्दी तोडेर इरान पुग्नु थियो।
बयानअनुसार जहाजमा रहेका गैरसैनिक चालक दलका सदस्यहरूले अमेरिकी सेनाबाट पटक–पटक दिइएका चेतावनी बेवास्ता गरेका थिए। त्यसपछि अमेरिकी नौसेनाको एमएच–६० हेलिकप्टरले जहाजको इन्जिन रुमलाई लक्षित गर्दै दुईवटा हेलफायर मिसाइल प्रहार गरेको सेन्टकमले जनाएको छ।
सेन्टकमले उक्त कारबाहीपछि जहाज इरानतर्फ अघि बढ्न नसकेको दाबी गरेको छ। “उक्त जहाज अब इरानतर्फ गइरहेको छैन,” सेन्टकमले भनेको छ।
सेन्टकमका अनुसार मंगलबार, अगस्ट ११ सम्म अमेरिकी नौसेनाले ५५ वटा व्यापारिक जहाजको मार्ग परिवर्तन गराएको छ। त्यस्तै, सहयोग नगरेका तीनवटा जहाजलाई निष्क्रिय पारिएको र दुईवटा जहाजमा खानतलासी गरिएको दाबी पनि सेन्टकमले गरेको छ।
अमेरिकी सेनाको यो कारबाही इरानतर्फ जाने समुद्री मार्गमा बढाइएको निगरानी र नाकाबन्दी कार्यान्वयनकै क्रममा भएको सेन्टकमको भनाइ छ।
Discussion about this post