काठमाडौं – नेपाल क्रिकेट संघ (क्यान) र डिसहोमले जारी नेपाल प्रिमियर लिग (एनपीएल) को डिजिटल (ओटीटी) प्रसारण अधिकार डिसहोमले प्राप्त गरेको पुनः जानकारी गराएका छन् । यससँगै, आधिकारिक माध्यमबाहेक अन्य कुनै पनि वेवसाइट वा एपमार्फत खेलको प्रत्यक्ष प्रसारण नगर्न र नहेर्न दुवै संस्थाले कडा चेतावनी जारी गरेका छन् ।
क्यान र डिसहोमद्वारा जारी संयुक्त विज्ञप्तिमा एनपीएलका खेलहरू डिसहोमको ‘डिसहोम-गो’ एपमार्फत मात्र आधिकारिक रूपमा हेर्न सकिने स्पष्ट पारिएको छ । आधिकारिक अनुमति बेगर खेलको प्रसारण, रेकर्डिङ, सम्पादन वा सामाजिक सञ्जालमा क्लिपहरू राख्ने कार्यलाई गैरकानुनी ठहर गर्दै त्यस्तो गतिविधिमा संलग्न जो-कोहीलाई प्रतिलिपि अधिकार ऐन अन्तर्गत कारबाही गरिने चेतावनी दिइएको छ ।
विज्ञप्तिमा अनधिकृत लिङ्कहरूमार्फत खेल हेर्दा दर्शकहरू साइबर अपराधको सिकार हुन सक्ने गम्भीर चिन्ता व्यक्त गरिएको छ । ‘अनधिकृत साइट वा एपहरूमा क्लिक गर्दा प्रयोगकर्ताको व्यक्तिगत तथा वित्तीय विवरणहरू चोरी हुने (फिसिङ/ह्याकिङ) उच्च जोखिम रहन्छ,’ विज्ञप्तिमा भनिएको छ । तसर्थ, दर्शकहरूको डिजिटल सुरक्षाका लागि पनि आधिकारिक एपको मात्र प्रयोग गर्न आग्रह गरिएको छ ।
क्यान र डिसहोमले कतै अनधिकृत रूपमा खेल प्रसारण भइरहेको भेटिएमा तत्काल जानकारी गराउन सरोकारवाला तथा क्रिकेट प्रेमीहरूमा अपिल गरेका छन् ।
