काठमाडौँ – गजलकार रीता बलामीको ‘आभासपुञ्ज’ गजलसङ्ग्रह र ‘बालमञ्जरी’ बालकवितासङ्ग्रह विमोचन भएको छ ।
प्रज्ञाभवनको लेखनाथ सभाकक्षमा कार्यक्रमका प्रमुख अतिथि एवम् वरिष्ठ गीतकार प्राडा कृष्णहरि बराल र अन्य अथितिले संयुक्तरूपमा उनको गजलसङ्ग्रह आभासपुञ्जको विमोचन गरे ।
वरिष्ठ कवि स्नेह सायमीको संयोजकत्वमा रातोघर र कार्डिनल इन्टरनेशनल बोर्डिङ हाइस्कुलद्वारा आयोजित सो विमोचन कार्यक्रममा ‘बालमञ्जरी’ को विमोचन प्रमुख अतिथि प्राडा कृष्णहरि बराल, विशिष्ट अतिथि एवम् वरिष्ठ बालकविता विशेषज्ञ प्रमोद प्रधान र अन्य अतिथिले संयुक्तरूपमा गरेका हुन् ।
विमोचित गजलसङ्ग्रहमाथि वरिष्ठ कवि एवम् गजलकार ललिजन रावलले समीक्षात्मक टिप्पणी गरे । उनले गजलका न्यूनतम सौन्दर्यको पालना गर्नुपर्ने भन्दै गजलकार रीता बलामीले आफ्ना अधिकाँश गजलमा सो सौन्दर्यको पालना गरेको बताए । उनले भने, “गजल गेय विधा हो । त्यसैले यसको लयचेतनामा सचेत रहे गजलको पहिलो सौन्दर्य पूरा हुन्छ ।”
उनले हिन्दी र नेपाली गजलका शेरमार्फत लय र त्यसको संरचनाको उदाहरण प्रस्तुत गरे ।
त्यस्तै गरी बालमञ्जरीमाथि टिप्पणी गर्दै विशिष्ट अतिथि प्रमोद प्रधानले बालकविताका चुनौती, विशेषता र गुणका बारेमा सबिस्तार टिप्पणी गरे । उनले शिशुकविता, बालकविता, किशोर र युवाकविताका बारेमा सप्रसङ्ग समीक्षा गर्दै बालकवि रीता बलामी विधागत संरचना, सौन्दर्य र शक्तिका ज्ञाता रहेको बताए ।
शिक्षक एवम् सञ्चारकर्मी दीपक लामिछानेद्वारा सञ्चालित कार्यक्रममा जूनकीरी इङ्गलिश स्कुल र कार्डियल इन्तरनेशनल बोर्डिङ हाइस्कुलका विद्यार्थीहरूले सुन्दर नृत्य प्रस्तुत गरेका थिए ।
वरिष्ठ कवि एवम् प्राज्ञ लक्ष्मी मालीको अध्यक्षतामा सम्पन्न सो कार्यक्रममा कवि एवम् गजलकारले आफ्नो लेखनयात्रा, चुनौती र उपलब्धिका बारेमा छोटो जानकारी दिए ।
“आफ्नो शिक्षणयात्रामा आधाजीवन बिताएँ ।” उनले सुनाइन् “अब बाँकी जीवन पनि अभिभावकको सपना पूरा गर्न र बालबालिकाको सुन्दर भविश्यका लागि बिताउन चाहन्छु ।”
“२०५१ सालदेखि निरन्तर लेखेँ, तर आफ्नै कृति प्रकाशन गर्न शिक्षण पेशामा दत्तचित्त भएर लागेको कारण समय निकाल्न सकिएन ।” उनले थप्दै भनिन्, “सहयोगी मनहरू, काशीराम विरस, स्नेह सायमीलगायतका साथी र अभिभावकको हौसलाले यी कृति निकाल्न सकेको हुँ । अब निरन्तर प्रकाशनमा लाग्ने अठोट गर्छु ।”
प्रमुख अतिथि प्राडा बरालले दुई कृतिका लेखक रीतालाई बधाइ दिँदै निरन्तर लाग्न हौसला दिनुभयो । उनले लेखनका कष्ट, चुनौती र जोखिमका बारेमा बताउँदै साधनाले गायक र अभ्यासले लेखक बन्ने बताए ।
लेखक बलामीले शुभद्रा, नवबिहानी, आरम्भ, प्रतिभा सुमनलगायतका साहित्यिक पत्रिका र पुस्तकको सम्पादन गरेकी छन् । उनी कार्डिनल इन्टरनेशनल बोर्डिङ हाइस्कुलका सहायक प्रधानाध्यापक र जुनकीरी इङ्गलिश स्कुलकी प्रधानाध्यापकसमेत हुन् ।
