काशीनाथ न्यौपानेको ‘अशून्यम्’ उपन्यास विमोचन

काठमाडौं । वैदिक तथा आध्यात्मिक साहित्यका विभिन्न पुस्तक प्रकाशनमा ल्याइसकेका साहित्यकार काशीनाथ न्यौपानेको नवीनतम उपन्यास ‘अशून्यम्’ एक समारोहकाबीच लोकार्पण गरिएको छ ।
शनिबार प्रज्ञा प्रतिष्ठानमा आयोजित कार्यक्रममा प्रा.डा. जयराज आचार्य, प्रा.डा. सर्वराज आचार्य, डा. पद्मप्रसाद देवकोटा, प्रभा कैनी तथा उपन्यासकार न्यौपानेले कृति लोकार्पण गरे ।
कार्यक्रममा प्रा.डा. जयराज आचार्यले व्यास भूमिलाई कर्मथलो बनाउँदै आएका न्यौपानेको यो उपन्यास अत्यन्तै महत्त्वपूर्ण कृति भएको उल्लेख गर्दै यस पुस्तकले हरेकलाई चिन्तन गर्न प्रेरणा दिने बताए । डा. पद्मप्रसाद देवकोटाले यो उपन्यास काल्पनिक सत्यतिर लम्केको जस्तो लाग्ने बताए ।
उक्त अवसरमा प्रा.डा. सर्वराज आचार्य, प्रभा कैनी र भुपेन्द्र खडकाले पनि एउटा गहन कृति औपन्यासिक बजारमा आएको उल्लेख गरे । यो उपन्यासलाई बुक हिलले बजारमा ल्याएको हो ।