काठमाडौं — अमेरिकी राष्ट्रपति डोनाल्ड ट्रम्प नेतृत्वको प्रशासनले अमेरिकाका लागि ब्राजिलकी राजदूत मारिया लुइजा रिबेरो भियोटीको भिसा रद्द गरेको छ। अमेरिकी विदेश मन्त्रालयका स्रोतहरूलाई उद्धृत गर्दै विभिन्न अन्तर्राष्ट्रिय सञ्चारमाध्यमहरूले मंगलबार उक्त जानकारी दिएका हुन्।
रिपोर्टअनुसार ब्राजिलले आगामी राष्ट्रपतीय निर्वाचनअघि भ्रमण गर्न चाहेका दुई अमेरिकी कूटनीतिज्ञलाई भिसा दिन अस्वीकार गरेपछि त्यसको प्रतिक्रियास्वरूप राजदूत भियोटीको भिसा रद्द गरिएको हो।
अमेरिकाले राष्ट्रपति ट्रम्पले प्रस्ताव गरेका ब्राजिलका लागि नयाँ अमेरिकी राजदूतको नियुक्ति प्रक्रियालाई ब्राजिल सरकारले जानाजान ढिलाइ गरिरहेको आरोपसमेत लगाएको छ।
यता, ब्राजिल सरकारले अमेरिकी निर्णयको विरोध गर्दै यसलाई दुई देशबीचको कूटनीतिक सम्बन्धमा तनाव बढाउने कदमका रूपमा टिप्पणी गरेको छ। साथै, अमेरिकाले ब्राजिलको आगामी राष्ट्रपतीय निर्वाचनमा प्रभाव पार्ने प्रयास गरेको संकेत यस निर्णयले दिएको ब्राजिलको दाबी छ।
राष्ट्रपति लुइज इनासियो लुला दा सिल्भाको कार्यालयले जारी गरेको विज्ञप्तिमा अमेरिकी कदमलाई वैचारिक रूपमा प्रेरित र ब्राजिलविरुद्ध शत्रुतापूर्ण नीति अपनाउने रणनीतिको हिस्सा भएको आरोप लगाइएको छ।
यस घटनापछि अमेरिका र ब्राजिलबीचको कूटनीतिक सम्बन्ध थप तनावपूर्ण बन्ने संकेत देखिएको छ।
