काठमाडौं – नेपाल स्रष्टा समाजले हरेक वर्ष प्रदान गर्दै आएको ‘दमन्ता खनाल स्मृति नारी स्रष्टा सम्मान’ यस वर्ष उदयपुरकी मालावती काफ्लेलाई प्रदान गर्ने भएको छ ।
ओझेलमा परेका नारी स्रष्टालाई प्रदान गरिँदै आइएको यस सम्मानका साथ नगद राशि २० हजार १११ रुपैयाँ प्रदान गरिने पनि समाजले जानकारी गराएको छ ।
आउँदो वैशाख ९ गते कार्यक्रम आयोजना गर्दै उक्त सम्मान अर्पण गरिने समाजका अध्यक्ष श्रीओम श्रेष्ठ ‘रोदन’ले जानकारी दिएका छन् ।
सामाजिक अन्यायविरुद्ध आवाज उठाउँदै आइरहेकी काफ्लेले झ्याउरे गीत सिर्जना गर्दै आएकी छन् । उनले संगिनीका माध्यमबाट आफ्ना शब्दहरू अभिव्यक्त गर्दै आएको समाजले जनाएको छ ।
समाजकी पूर्वमहासचिव तथा गीतकार पुष्पा खनालले यो सम्मान ०७५ सालमा आफ्नी आमाको स्मृतिमा स्थापना गरेकी हुन् ।
