नारायणी नदी किनारको गैँडाकोटमा चार गजलकार सुनिएका छन् । ‘गजलसँग’ शृंखलाअन्तर्गत ११औँ अंकमा शनिबार काठमाडौंका बाबु त्रिपाठी, विराटनगरकी वविता भुजेल, चितवनका लेखराख सापकोटा र देवघाटका एसआर दुवाडीले गजल सुनाएका थिए ।
गजल मञ्च चितवनले नियमित रूपमा सञ्चालन गर्दै आएको कार्यक्रममा सहभागी सबै सर्जकले तीन चरणमा गरी छ-छवटा गजल सुनाए । वाचनसँगै गायन शैलीमा पनि प्रस्तुत गरिएको कार्यक्रमलाई दर्शकले निकै मन पराएका थिए ।
गजल मञ्च चितवनले नयाँ सर्जकलाई प्रोत्साहन र अनुभवीलाई सम्मान गर्ने उद्देश्यले यस्तो शृंखलालाई निरन्तरता दिँदै आएको छ र विविध भौगोलिक क्षेत्रका प्रतिनिधि सर्जकलाई एकै मञ्चमा ल्याइनुले गजल लेखनको दायरा फराकिलो बन्दै गएको मञ्चका अध्यक्ष रामकृष्ण अनायासले बताएका छन् ।
गजल विधाको प्रवद्र्धनका लागि स्थापना भएको गजल मञ्च चितवनले प्रत्येक वर्ष विभिन्न प्रकारका गजलजन्य कार्यक्रम गर्दै आएको छ । मञ्चले गत १७ जेठमा माडीस्थित सोमेश्वर गढीको फेदीमा ‘गढीमा गजल’ कार्यक्रम आयोजना गरेको थियो ।
