काठमाडौँ– हंगेरीको विपक्षी पार्टी टिसजाले संसदीय निर्वाचन जितेको छ । जसको नेतृत्व पिटर मग्यारले गरिरहनुभएको छ । आईतवार भएको संसदीय निर्वाचनमा बहुमत हासिल गर्दै प्रधानमन्त्री भिक्टर ओर्बानको सत्ताधारी गठबन्धनलाई पराजित गरेको छ । राष्ट्रिय निर्वाचन कार्यालयले सार्वजनिक गरेको प्रारम्भिक नतिजाअनुसार यो जानकारी प्राप्त भएको हो । एनइओद्वारा गणना गरिएको ९८.८९ प्रतिशत मतअनुसार टिसजाले ५३.२१ प्रतिशत मत प्राप्त गरेको छ र १९९ संसदीय सिटमध्ये १३८ सिट जित्ने प्रक्षेपण गरिएको छ ।
जुन दुई–तिहाइ बहुमत भन्दा बढी हो । ओर्बानको सत्ताधारी फिडेज–केडीएनपी गठबन्धनले ३८.२६ प्रतिशत मत प्राप्त गरेको छ र ५५ सिट जित्ने प्रक्षेपण गरिएको छ । अति–दक्षिणपन्थी ‘आवर होमल्याण्ड मुभमेन्ट’ ले ५.८५ प्रतिशत मत जितेको छ र ६ सिट पाउने प्रक्षेपण गरिएको छ । अन्य पार्टीहरू संसदमा प्रवेश गर्न आवश्यक ५ प्रतिशतको थ्रेसहोल्ड पार गर्न असफल भएका छन् । प्रारम्भिक तथ्याङ्क अनुसार करिव ८१ लाख योग्य मतदातामध्ये ७७.८ प्रतिशतले मतदान गरेका छन्, जुन एक कीर्तिमानी उच्च संख्या हो ।
बुडापेस्टमा समर्थकहरूलाई सम्बोधन गर्दै ४५ वर्षीय मग्यारले आफ्नो पार्टीको निर्णायक विजयको प्रशंसा गर्दै यो विजय हरेक हंगेरीको झ्यालबाट देख्न सकिने बताउनु भयो । मध्य–दक्षिणपन्थी टिसजा पार्टीको यो विजयले ओर्बानको लगातार १६ वर्षको सत्ताको अन्त्यको संकेत गर्दछ । ओर्बानले १९९८ देखि २००२ सम्म हंगेरीको प्रधानमन्त्रीको रूपमा सेवा गरेका थिए र २०१० मा सत्तामा फर्केपछि निरन्तर पदमा रहेका छन् ।
अभियानका क्रममा टिसजाले भ्रष्टाचार विरोधी र संस्थागत सुधारमा ध्यान केन्द्रित गरेको थियो, कानूनको शासन र पारदर्शी शासनको पुनस्र्थापनाको लागि आह्वान गरेको थियो। एजेन्सी
