जोर्डनद्वारा सिरियाली सीमा क्षेत्रका लागुऔषध र हतियार तस्करी केन्द्रहरूमा आक्रमण

काठमाडौँ- जोर्डनको सशस्त्र बलले सिरियासँग जोडिएको आफ्नो उत्तरी सीमा क्षेत्रमा सक्रिय लागूऔषध तथा हतियार तस्करहरूका ठेगानाहरू लक्षित गरी आईतवार बिहानै हवाई आक्रमण गरेको छ । सेनाद्वारा जारी आधिकारिक विज्ञप्तिमा यस सैन्य कारबाहीको पुष्टि गरिएको हो । सेनाकाअनुसार उक्त कारबाहीमा तस्कर समूहहरूले जोर्डनी भूमिमा अवैध सामग्री ओसारपसार गर्न प्रयोग गर्ने कारखाना, कार्यशाला र गोदामहरूलाई पूर्ण रूपमा नष्ट गरिएको छ । यी स्थलहरूलाई तस्करहरूले जोर्डनतर्फ अवैध गतिविधि सञ्चालन गर्ने मुख्य केन्द्रका रूपमा प्रयोग गर्दै आएका थिए । सशस्त्र बलले यो कारबाही भरपर्दो गुप्तचर सूचना र परिचालन तथ्याङ्कका आधारमा गरिएको जनाएको छ । मुलुकभित्र लागूऔषध र हतियारको अवैध प्रवाह रोक्नका लागि अत्यन्त सटिक रूपमा यो अपरेशन सञ्चालन गरिएको सेनाको दाबी छ ।
पछिल्लो समय सीमा क्षेत्रमा हतियार र लागूऔषध तस्करीका प्रयासहरूमा उल्लेख्य वृद्धि भएको सेनाको विज्ञप्तिमा उल्लेख छ। जोर्डनले विगत केही वर्षदेखि सिरियासँगको उत्तरी सीमामा सक्रिय लागुऔषध तस्करी सञ्जालहरू विरुद्ध निरन्तर यस्तै प्रकृतिका कारबाहीहरू गर्दै आएको छ । लागुऔषध र हतियार तस्करी नियन्त्रणका लागि जोर्डन र सिरियाबीच रक्षा तथा सुरक्षा क्षेत्रमा उच्चस्तरीय समन्वय र सहयोग रहँदै आएको भए तापनि तस्करीको चुनौती भने कायमै रहेको छ । एजेन्सी